«Слово» – 2-га неділя Великого посту – неділя, 9.00 год.

Першов уж другый тыждень святого Посту. Часу, коли маме глубше позаставити ся над собов. Глубше себе познати. Познати свої слабости, свої гріхы, жебы іти ку тому, котрый мать міць одпущати гріхы.

Як то чуєме і в днешнім слові. Ісус приходить до Капернаума. Міста, де зробив найвеце чудесных діл. Коли ся рознесло, же є в місті, посходило ся так вельо народа, же в домі, де учів, не было місця ани при дверях. А якраз тогды приношали невладного чоловіка, котрого несли четверо мужів. Коли не нашло способ як дістати ся днука, вышли на стріху, зробили діру до повалы і спустили так невладного перед Ісуса.

Ісус видячі їх віру, говрить невладному: Одпущають ся тобі твої гріхы. Тоты, котры його принесли, зачудовано слухають тоты слова. Могли сі повісти: тадь мы не та його принесли. Але зато, жебы його Ісус выздравив. А він ту говорить о одпущіню гріхів. Подобно у своїх сердцях реаґовали і учітелі закона і фарізеї: Він говорить богозневажливо.

Ісус Познав думкы єдных і другых. Видів до сердця тых людей, котры принесли невладного. Прото Євангеліста говорить: Ісус видів їх віру. А тыж видів до сердця фарізеїв і учітелів закона. Тым адресує: прошто так плано роздумуєте у своїх сердцях? І додав: што легше, вздравити душу ці тіло? А жебы вы знали, же я мам тоту міць, повів невладному, возьмий свою постіл. А він такой встав здравый і вышов вон на очах вшыткых.

Ту видиме, же Ісус на першім місці поставив дбаня о безсмертну душу. А тілесне здравя мать значіня лем в одношіну ку здравю душы. Кедь душа хвора гріхом, тогды якый хосен бы быв із здравого тіла? Ісус указує яку велику ціну мать наша безсмертна душа. Наперед выздравлять душу, аж так тіло.

І про нас поучіня в часі Великого посту. Глубоке позння і прийти ку Ісосви, жебы і мы могли чути: Довіряй, одпущають ся ті твої гріхы. Слава Ісусу Хрісту!

В неділю, 31. марца 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 31. марца 2024 р. о 12.00 год. і 1. апріля 2024 р. о 2.00 год. за русиньскым часом.