«Слово» – 22-га неділя по Сошетствії Святого Духа – неділя, 9.00 год.

Євангеліє нам росповідать о двох людях. Єден богач, котрый облікав ся до файного облечіня, каждый день веселив ся, пережывав свої дні в роскошах, насолодах. А другый быв Лазарь, котрый быв бідный, лежав під дверями того богача, і не мав, што вложыти до уст, хотів, хоць лем одробинок, што падали зо стола богача на землю. Быв покрытый струпами, псы приходили лизати йому раны.

Но пришов час одходу з того світа про Лазаря, ангелы го занесли до лона Авраама. Но умер тыж і богач і поховали го. Його тіло поховали може з великов честьов жытелі міста, но його душу демоны поховали в аді вічной погыбелі. Лазарь може быв лем заграбаный, може ани не было вельо людей на його погробі. Но його душа торжественно перенесена была в супроводі ангелів на місце блажености. Як ся змінила сітуація. Богач, теперь бідниый у вічнім огні видить Лазаря у блажености. Просить Авраама о капочку воды на палець, жебы освіжыти свій язык. Кідь тото му є одрікнуто, просить післати Лазаря до дому своїх братів, жебы їм свідчіти, но знову діставать одповідь: мають слухати Мойсея і пророків. Кідь так не роблать, не увірять, ани кібы дахто із мертвых воскреснув.

Євангеліє вказує нам велику правду, вказує на скороминаючость того земного, і же ани слава, ани богатство не сохранить чоловіка перед моментом смерти. Раз каждый мусить опустити тото вшытко земне. Діявол старать ся о то, жебы чоловік не думав на вічность, жебы ся дав втягнути до роскоші, земного богатства, жебы не чув думку на смерть. А тота пиходить несподівано як злодій вночі.

Най і тото слово пробудить нас ку плодному хрістіанському жывоту, жебы тот момент не пришов про нас нечекано, но жебы як по Лазаря і про нас пришли святы ангели, перенесли нас через пространства князів того віку – демонів, і занесли на місце вічной радости з Господом нашым Ісусом Хрістом. Слава Ісусу Хрісту!

В неділю, 29. октобра (жолтня) 2017 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 29. октобра 2017 р. о 15.00, 20.00 год. і 30. октобра  o 2.00 год. за русиньскым часом.

Фото: Рільскый монастырь. Жрідло – Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА