«Слово» – 22-га неділя по Сошествії Святого Духа – неділя, 9.00 год.

Днешнє слово євангелія на прикладі двох людей – богача і Лазаря нас учіть великій мудрости. Указує нам правдивы цінности в нашім жывоті. А тыж куртость того земного жывота а вічность того другого.

Богач собі жыв в роскошах, дорогых облечінях, гостинах, веселостях, а то каждый день. Думав собі, же так буде навсе. Не думав на смерть, на свою душу, на вічность. Лазарь, тот лежав при воротах богача, повный ран, хворый, голодный. Ани лем одробинкы, котры падали зо стола богача му не дав нихто. Но пришов момент одходу: Лазаря взяли ангелы до лона Авраама, то є на місце радости. А богача поховали. О Лазарьови може ани нихто не знав як ся зове. А богача вшыткы знали. Може і много людей пришло на похорон. Но якый із того быв про нього хосен? Жадный. Його душу однесли ангелы темноты на місце мук. Тогды ся сітуація тых двох змінила. Лазарь радує ся а богач терпить мукы на цілу вічность. Просить Авраама о капочку воды, жебы указати якы страшенны суть мукы аду. Потім просить послати Лазаря до дому отця, жебы їм свідчів. Но Авраам одповідать: Мають Мойсея і пророків. Кедь тых не будуть слухати, ани кебы дахто воскрес із мертвых не будуть вірити і каяити ся.

Тым словом учіть і нас – мерьковати на наш жывот, дбати о свою безсмертну душу, піднимати очі нашой душі ку небу теперь, покы сьме на тім світі. Приношати щіре покаяня за свої гріхы, жебы вічно радовати ся з Лазарьом і Авраамом а не вічно мучіти ся з тым богачом. Слава Ісусу Хрісту!

В неділю, 8. новембра 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 8. новембра о 12.00 год. і 9. новембра о 2.00 год. за русиньскым часом.