«Слово» – 22-га неділя по Сошествії Святого Духа – неділя, 9.00 год.

Днешнє Євангеліє нам розповідать о жывоті двох людей з двох поглядів. З погляду того земного жывота, і з погляду вічности.

Єден, котрого імя не знаме, быв чоловік барз богатый, ужывав собі того світа в гостинах, файнім облечіню, богатстві. Так проходили його дні. Чув ся щастливый, нич йому не хыбило, што собі здумав, та і мав. Другый звав ся Лазарь. Тот быв бідный, і ку тому покрытый струпами і ранами по цілім тілі. Лежав при домі богача, і хотів ся накормити хоць лем одробинками, што падали зо стола богача. Но нихто йому не дав ани то. Так проходив час жывота богача в радости, годованю, а Лазаря в трапліню, болестях.

Но стало ся єдного дня, же жывот Лазаря завершыв ся. Може на його похороні было мало людей. Може місто в тихости його поховало як жобрака. Но його душу ангелы занесли на лоно Авраама, до великой радости.

Але пришов час умерати і про богача. Быв то може величавый похорон, на котрый пришло вельо людей. Но Євангеліє нам говорить строго: Умер і поховали го. А його душу взяли демоны на місце мук до аду.

Як ся нараз сітуація змінила. Тот, котрый быв бідаком тілом, но быв богачом у своїм внутрі. Не проклинав, не надавав на богача, не нарікав на свій жывот, ани на Господа Бога. Терпезливо зношав своє трапліня. Теперь ся радує, і його радости не буде кінця. Тот, котрый собі ужывав, котрый може погорджовав тым Лазарьом, теперь є бідаком. Находить ся в аді, у вічній погыбели.

Здалека увидів Лазаря і просить Авраама, жебы послав Лазаря освіжыти йому язык капков воды. Но Авраам йому припоминать, же мав принагоды на землі, не выхосновав, теперь є рішіня незмінне, а є пропасть, так нихто не може перейти з єдной стороны на другу. Тыж, коли просить послати Лазаря до дому братів, Авраам одповідать, мають Мойсея і пророків, най їх слухають, бо кедь не будть їх слухати, ани кебы дахто воскрес із мертвых, не увірять.

Тото слово є адресоване нам. Ісус нас позывать до свого царьства, давать нам свої благодати. Маме єден дар, час того земного жывота, котрый буде рішати о нашій вічности. Выхоснуйме, слухайме, уж не Мойсея і пророків, але самого Бога, котрый став ся чоловіком і говорить ку нам через своє слово. Приймийме тото слово і жыйме подля нього, жебы сьме раз не мусили бановати як тот богач, але буде уж нескоро. Слава Ісусу Хрісту!

В неділю, 13. новембра 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 13. новембра 2022 р. о 12.00 год. і 14. новембра 2022 р. о 2.00 год. за русиньскым часом.