«Слово» – 24-га неділя по Сошетствії Святого Духа – неділя, 9.10 год.

Євангеліє описує выздравліня жены, котра довгы рокы терпіла на кровотечіня і воскресіня дівкы Яіра- начальника сінаґоґы. Тот приходить за Ісусом Хрістом і просить о поміч, бо його двіка вмерала. Ісус іде з ним, но по дорозі є міджі народом, котрый іде з Ісусом, є і жена, котра од 12 років терпіла на кровотечіня. Она є сі свідома свойой нечістоты, і прото лем дотулять ся од заду Ісусового облечіня, а такой была выздравлена. Но Ісус одкрывать їй велику віру перед вшыткыма, жебы прославити тоту жену за їй віру. Бо много притискало Ісуса по дорозі, але лем она сама го дотулила з віров а єднак і підкріпити віру Яіра, котрому в тім часі ознаміли, же його дівка уж умерла. Ісус му говорить: Не бій ся, лем вірь! А іде з ним, і воскрешать уж мертву, а привертать єй не лем знову земный жывот но і дарує выздравліня тілу. Днешнім євангеліом Ісус хоче посилнити і нашу віру. І мы можеме находити ся в такых сітуаціях або як кровоточіва жена – терпляч на різны хвороты страстей, привязаностей, котры нас звязують і беруть покій душі, ці різны проблемы, тяжкости, або подобно тій дівочці – коли душа є мертвов через гріх. Ісус мать владу як владыка жывота і смерти дати слободу і воскресити. Нихто не мусить падати на духу. Говорити – мі уж не є помочі. І нам говорить – лем вірь! Слава Ісусу Хрісту!