«Слово» – 25-та неділя по Сошествії Святого Духа – неділя, 9.00 год.

За Ісусом приходить учітель закона і звідує ся: Учітелю, што мам робити, жебы набыти вічный жывот? Ісус йому одповів: Што чіташ в Законі? Він одповів: Любити Бога і ближнього. На што Ісус повів: Так роб і будеш жыти.

Тот учітель закона пришов не нато, жебы глядав одповідь, але жебы покушав Ісуса. Жебы ся высміяв з його наукы о вічнім жывоті. Ісус, хоць знав, што ся находить в його сердці, не одвергує го, але давать йому одповідь. Но таку, котра была на хосен. Одосылать го на Закон. Тадь быв тот чоловік Учітель закона.

А коли Ісус йому повів, жебы жыв подля найвекшой заповіді і буде жыти вічным жывотом, тот ся хоче оправдати. А говорить хто є мій ближній? А Ісус говорить приклад о чоловікови сходившым до Єріхона, котрый упав до рук розбійників. А не поміг йому ани священик, ани левіт, але самаріян. Тот, котрым Жыды оповерговали. А як закончів образный приклад Ісус йому повів: Ідь і роб так само.

Ісус йому тым образным прикладом указав, же він є тым чоловіком, котрый упав до сіті, або рук розбійників, демонів. Они йому засліпили душу, зранили, жебы не познав Спасителя. А приходить Ісус, котрого часто называли самаріяном, наляв на раны олій і вино свойой любви і свойого одпущіня, приводить до Церькви, звірює священикам до свойого приходу.

А нам тота подія говорить, же Ісус Хрістос приїмать каждого, хто ку ньому прииходить. Тыж але выжадує од нас, жебы сьме робили так само. Як мы зазнаваме милосердя од Господа, так і мы маме быти милосердны ку нашым ближнім. Бо Господь є все милосердный ку нам, коли впадеме дро рук розбійників гріха, страсти.

Прото не приходьме ку Ньому лем з вонкашнім вопросом а облестно, як тот учітель закона. Але приходьме щіро а робме так, як нам говорить. Ідь а роб так само і ты. Слава Ісусу Хрісту!

В неділю, 12. децембра 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 12. децембра о 12.00 год. і 13. децембра о 2.00 год. за русиньскым часом.