«Слово» – 25-та неділя по Сошетствії Святого Духа – неділя, 9.10 год.

В днешнім євангелію ку Ісусови приступує єден учітель закона, котрый звідує ся, што робити, жебы здобыти вічный жывот. Вопрос важный, но він приходить не глядати одповідь, але жебы спокушати Ісуса. Ісус як Бог добрі знав, чом приходить тот чоловік, і давать одповідь через вопрос: Што написано в законі? Што там чіташ? Тот одповів: Люб Господа твойого Бога і свого ближнього як самого себе! На тото Ісус одповідать: Добрі, правилно єсь одповів! Так роб і будеш жыти. Тото є посолством днешнього євангелія і нам: Не лем прияти інформацію – ці через проповідь, духовне слово, чітаня Божого слова, але є потрібне і вовести тоту інформацію до жывота. Што написане – прияти інформацію. Што там чіташ – як тото розумієш? Як тото аплікуєш до жывота? І нам Ісус говорить, кідь познаме його заповіді, жебы не зістати лем на тім, але іти і далше. Так роб і будеш жыти. Слава Ісус Хрісту!