«Слово» – 3-тя неділя по Сошетствії Святого Духа – неділя, 9.00 год.

Ісус Хрістус часто хоснує тему світла. Сам ся называть Світлом про тот світ. Днешнє чітаня нам говорить, же світилник про тіло є око. Кедь є око ясне, ціле тіло буде у світлі, кедь є лукаве, ціле тіло буде в темноті.

Потім Ісус переходить до слова о служіню двом панам і о непотребных старостях. На першый погляд як бы то не навязовало на слово о світлі. Але кедь ся задумаме глубше, так є там споїня.

Ісус дале говорить, же нихто не може служыти двом панам – Богу і мамоні. Під словом мамона є згорнуте вшытко, чому чоловік давать першенство у своїм жывоті – облечіня, їдло, богатство, роскошы. Кедь тото поставиме на перше місце, зачінаме тому служыти як божеству і приношати жертву нашого часу, опанованя тым нашых думок, нашых діл. А тото нас одводжать од Бога, од вічности, од думкы на небо, на мукы пекла.

Ісус дале поуказує лем дакотры із такых старостей: старость о облечіня, як противагу указує посмотьте на небесны птахы – Ваш отец небесный їх кормить. Поуказує на польову лелію – ани Соломон царь у цілій своїй славі не быв облеченый так, як єдна із них. А потім додав, кедь Бог так облікать польову траву – днесь красна заквітнута, завтра спріє і шмарять до огня. Дале додав, кедь Бог так старать ся о птахы, о польову лелії – ці не тым скорше постарать ся о вас, маловірны?

Прото повів – тото вшытко выглядавають погане, котры не мають надії на вічность, жыють лем про часне, про тіло. Но Вы наперед глядайте царьство і його справедливость, і тото вшытко ся вам дасть. Но дасть ся не як дашто головне, але як додаток. Слава Ісусу Хрісту!

В неділю, 3. юла 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 3. юла о 12.00 год. і 4. юла о 2.00 год. за русиньскым часом.