«Слово» – 3-тя неділя Великого посту – неділя, 9.00 год.

Дішли сьме уж до третьой постной неділі. В днешню неділю нам свята Церьков ставить перед нас святый Крест, котрый ся выкладать на утрені і є выставленый цілый тыждень. Дайме собі опрос: Чом в середині поста нам свята Цеьков указує на Крест? Бо укзує не як на знак терпіня, болести, але як на знак побіды Хріста над смертьов і над гірхом а адом.

Бо хто справды бере собі к сердцю тот час і твердо працує за помочі Божой благодати над собов, як і дотримує строгый піст, того силы помаленькы слабнуть. А якраз, жебы обновити нашы силы поуказаньом на Крест, як на побідный знак Хріста, нам Церьков припоминать: уж не довго, Пасха уж є близко, не падай на дусі.

А днешнє Євангеліє нам так само указує на Крест. Ісус говорить: Хто хоче іти за мнов, най одрече ся самого себе возьме свій крест і мене наслідує. Ісу нам давать предложіня. Позывать нас, але решпектує нашу слободну волю: Не говорить нам: мусиш ся молити, постити, ходити до церькви, сповідати ся.

Ні, Ісус говорить – кед хочеш. То діавол не решпектує слободну волю, але хоче стягнути до свого рабстава. Але Бог у своїй любви решпектує слободний выбер каждого. Най одрече ся самого себе – свойой грішной природы, старого чоловіка – котрый є наставленый слухати Божого противника. Най возьме свій крест – в каждій єдній сітуації. Не лем тогды, кедь нам добрі, маме дяку на молитву, піст, довры діла. Але коли приходить даяка тягота на нас, біда, хворота, смерть близкой особы. Тогды діавол приступує а говорить: Смоть тілько ся намагаш, молиш ся, постиш, жыєш добрый хрістіаньскый жывот; а посмоть як Бог ся ті одплатив. Так хоче діавол напрямити чоловіка протів Бога.

Посмотьте на приклад Йова: пришов о маєток, діти, і здравя зависливостьов діавола, а і так остав вірный Господу Богу. А то была доба іщі Старого завіта. Йов не чув тоты слова, а предсі їх выповнив ділом. Потом Ісус додав: най мене наслідує. Лем так можеме быти наслідовачами Хріста, кедь ся одречме од свойой волі, жебы повнити Божу волю. Кедь возьмеме каждый день нашы кресты. Но Ісус нам давать підкріпліня, коли повідать, хто ся буде ганьбити за мене і мої слова, за того ся буде ганьбити і Сын чоловіка в часі свойого славного приходу.

А так нас днешня неділя, указуючі, же уж недовго, же дорога ку Пасхі уж недалека, хранить перед малудошностьов, а праві навспак підкріплять силы, видячі, же Пасха є уж перед очами. Але нелем тота земна, же за куртый час настане, але і тота небесна: уж лем куртый час.

Прото не падайме на духу, не дайме ся обаламутити діаволом при тяжкых, высилуючіх сітуаціях, але смотьме на Крест, а запальме ся іщі векшов надхеностьов і запаленостьов на дорозі ку земній Пасхі і ку тій небесній. Слава Ісусу Хрістру!

В неділю, 7. апріля 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 7. апріля 2024 р. о 12.00 год. і 8. апріля 2024 р. о 2.00 год. за русиньскым часом.