Голосник

«Слово» – 3-тя неділя Великого посту – неділя, 9.00 год.

Третя неділя святого посту называть ся і Крестопоклоннов недільов. В часі утрені той неділі ся выкладать святый крест на тетрапод. Крест не як знак болести і терпіня, але крест як знак побіды, потіхы і посилы в постнім часі.

Но жебы быв і про нас крест знаком побіды, Ісус Хрістос в слові днешнього євангелія давать нам условії. Першым є рішіня нашой волі: Господи хочу. Уж в раю нашым прародічам быв даный тот дар і Бог все решпектує рішіня слободной волі чоловіка. Другым условієм є одшмарити, одверьгнути самого себе – то є, старого чоловіка приготовленого слухати іншы голос, не тот Божый. Але голос діявола, голос того світа, голос роскошей, голос страстей, глос гріха. Голос котрый приваблює облесно а старый чоловік в нас охотно ся повинує тому голосу. Прото Ісус говорить, же наперед є потрібне тото покаяна – зміна думаня, жебы слухати іншый голос, голос Хріста.

І третім условієм є взяти свій крест – вшытко, што ня пострітне на тій дорозі без дудротаня, наріканя, бунтованя – ці є то ображаня, пронаслідованя, понижованя од іншых людей про Сына чоловіка. Ці є то хворота, болесть, якась біда, трапліня. Ці є то внутрішнє трапліня, покушіня. Тото вшытко прияти з вдячностьов, знаючі, же сьме в Божых руках. З довіров без отчаяня і безнадійности. Посліднім условієм є – наслідуй мене. Ісус указує дорогу. Він повів: Я єм дорога.. Він перешов тов дорогов а є з нами і веде і нас. Нам треба лем ся тримати Ісуса а не бояти ся ничого іншого.

Так днешня неділя є про нас недільов потіхы і надії окремо в тім часі. Піднимайме свої очі од того, што тепер хоче забрати цілу нашу мысль. А посмоть горі, на крест, на Ґолґофту і на то, што є за Ґолґофтов – на славне воскресіня. Слава Ісусу Хрісту!

В неділю, 22. марцa 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 22. марця о 12.00 год. і 23. марця о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Avatar

Коментарі