«Слово» – 31-ша неділя по Сошествії Святого Духа – неділя, 9.00 год.

Ісус приходить ку Єрихону. Там при дорозі сидів сліпый чоловік і жобрав. Коли зачув, же множество людей переходить, звідує ся, што ся то діє. Повіли йому: То Ісус переходить тов дорогов.

Він як тото чув, такой зачав кричати: Ісусе, сыну Давіда, розмилуй ся надо мнов. Тоты, ідучі впереді, го окриковали, жебы быв тихо. Він кричав голосніше: Ісус ся заставив і дав собі його закликати. Звідує ся: Што хочеш, же мам про тя зробити? Господи, най провиджу. Ісус ся го дотулив і повів: Провидь, твоя віра тя сохранила. А такой провидів і радостно ішов за Ним по дорозі.

Ісус видів того сліпого, познать його жывот. Заставив ся, дав го закликати. Неодбытность того сліпого ся оплатила, Ісус о нім знать. Він вірить, же лем Ісус йому може помочі. Прото кричіть голосніше. Знать, же тото є може послідня прнагода, кедь не выхоснує, буде до смерти сліпым. Прото кричіть. А яка радость го заплавила, кедь Ісус го закликав і вертать йому світло очей.

Ісус і нас кличе, коли сьме сліпы гріхом, страстями, привязаностьов ку земному. Кличе нас: Подьте, укажте мі рану на вашых духовных очах. Я вам дам світло. Высповідайте ся перед мнов щіро, а радость заплавить вашу душу.

А коли быв выздравленый, ішов за ним. Знова наука про нас. Кедь стоїме, то кедь маме світло, крачайме за Хрістом. Бо Він сам повів: Хто мене наслідує, не буде ходити в темноті, але буде мати світло жывота.

А так, кедь нас гріх засліплює, понагляйме ся ку Ньому, жебы сьме провиділи, а кедь маме світло, дбайме о то, жебы крачати за Ним і будеме мати світло жывота. Слава Ісусу Хрісту!

В неділю, 30. януара 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 30. януара о 12.00 год. і 31. януара о 2.00 год. за русиньскым часом.