«Слово» – 31-ша неділя по Сошествії Святого Духа – неділя, 9.00 год.

Євангеліє днешньой неділі нам ставить перед нас подію выздравліня сліпого в Єріхоні. Коли Ісус Хрістос быв на дорозі до Єрусалима, жебы прияв спасительны страсти за спасіня людей, переходив через Єріхон.

Там при дорозі сидів єден сліпый і жобрав. Каждый день тот чоловік находив ся там і просив милостыню од переходячіх. Єдного дня чує, же іде велике множество людей. Махать руками коло себе і ся звідує, што ся то діє. І говорять йому: То Ісус із Назарета переходить. І Йому засвітило. Ісус, тото імя уж чув од людей вельо раз. Знать, же є то великый чудотворець, а выздооавив і сліпых. А кілько раз роздумовав, кебы так раз пришов Він і ту. А нараз чує: тадь Він є ту.

Є то єдина принагода на выздоровліня. Вірить, же лем Він йому може помочі. А зачінать кричати: Ісусе, Сыне Давіда, розмилуй ся надо мнов. Но переходячі йому сперають кричати. Грозять йому: Будь тихо. Може ученикы, може то были дакотры з людей, котры напинали свій слух, жебы чути слова, котры Ісус говорив. Може то были фарізеї, або ученикы закона, котры не хотіли звекшіня популаріты Хріста, кедь зробить далше чудесне діло. Но тот сліпый не дав ся знеохотити ани застрашыти, кричав іщі голосніше: Ісусе, розмилуй ся надо мнов.

А Ісус ся заставив, дав собі його закликати. Ісус добрі знав о тім сліпім, але хоче, жебы він сам дав знак, же хоче благодать од Хріста. Коли його привели, Ісус ся звідує: што ты хочеш од мене? А він мать лем єдно прошіня: хочу провидіти. А Ісус на то: провидь. А такой ся йому отворили очі.

Ісус ся не потребовав звідовати, же што потребує тот чоловік. Але потребує рішіня слободной волі. Подобно і в нашім жывоті. Ісус знать, што потребуєме. Ісус знать і о нашых гріхах, не потребує їх од нас чути. Як Бог є притомный всягды а то в моменті, коли мы штось зробиме, або в чімсь грішыме. Але потребує, рішіня нашой волі, же хочеме одпущіня нашых гріхів. Бо нам подаровав слободну волю. Зато не потребує чути нашу сповідь, але она є потрібна на то, же даваме тым знати, же через сповіданя нашых гріхів одрікаме ся од них, а хочеме прияти Боже одпущіня.

А в днешнім слові видиме іщі єден важный момент: коли сліпый спознавать, де є рішіня його проблемы. Же Хрістос є тов одповідьов. Є ту спераня з боку іншых. Тото ся діє і в нашім жывоті. Кедь находиме ся в темноті гріха, страстей, отчаяня, резіґнації, ту нам засвітить світло – Хрістос є рішіня твойой проблемы. Але приступує діавол, котрый сперать, нашептавать, знеохочать.

Тыж може і найблизшы ставають ся средством в руках злого, жебы одрадити іти ку Хрістови. А ракція того сліпого? Кричав іщі голосніше: Ісусе, помилуй! А выплатило ся. Так є прикладом і про нас. Не дати ся одрадити ничім а никым на дорозі ку Хрістови. Слава Ісусу Хрісту!

В неділю, 26. януара 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 26. януара 2025 р. о 12.00 год. і 27. януара 2025 р. о 2.00 год. за русиньскым часом.