Голосник

«Слово» – 4-та неділя по Сошествії Святого Духа – неділя, 9.00 год.

Днешнє слово євангелія о выздравліню стотникового слугы нас учіть о важности віры. Кедь Ісус приходить до Капернаума, пришов ку ньому стотник, котрый мав тяжко хворого слугу, котрого собі барс цінив.

Кедь Ісус одповів на його прошіня, же прийде і го выздравить, стотник на тото одповів: Я того недостойный, але повідж лем слово і мій раб буде здравый. Стотник порівнять свою позіцію, бо быв під началством і мав під собов вояків. І мав над нима авторіту. Прото говорить Ісусови, кедь я мам таку авторіту, тым веце Ты, котрый не маш никого над собов і можеш повісти смерти і хвороті най одыйде і послухать.

Ісус, чуючі такы слова ся зачудовав над так великов віров. І зачав бісідовати о спасіню многых із поганів, котры прийдуть із выходу і западу до Божого Царьства, а сынове Царьства будуть вышмарены вон до тмы. Тыма словами указує, же тот стотник , хоць поган, но віров уж є воваджаний до царьства. А Жыде, котры ся хвалили законом, пророками через невіру суть вымітованы вон.

Тото слово і про нас є важным, жебы нелем хвалити ся, же мы сьме хрістіане, належыме до Церькви, молиме ся, постиме… Але жебы наш жывот свідчів о нашій вірі. Так, як у того стотника, котрому Ісус на потведрджіня його віры повів: Ідь, най буде, як ты увірив. І його раб быв в тій годині здравый. Слава Ісусу Хрісту!

В неділю, 5. юла 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 5. юла о 12.00 год. і 6. юла о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Avatar

Коментарі