«Слово» – 6-та неділя по Сошествії Святого Духа – неділя, 9.00 год.

Iсус Хрістос приходить до Капернаума. Міста, де зробив найвеце чудесных діл. Коли пішла поголоска, же Ісус є в місті, позбіговало ся велике множество народа. Так, коли Ісус быв в домі і учів, не было там місця.

А тогды приходäть четверо людей, несучі зо собов невладного чоловіка. Як пришли, не могли войти днука, та вышли на стріху, зробили діру, пробили ся через повалу і спустили го перед Ісуса. А Ісус, видячі їх віру, говорить невладному: Довіряй, не бій ся, одпущають ся ті твої гріхы.

Тоты слова зачудовали тых людей, котры го принесли. Тадь они чекали выздравліня його тіла. А ту Ісус говорить о одпущіню гріхів. Може в духу мерзили ся на Ісуса.

Но были там і фарізеї, учітелі закона, котры пришли не слухати, але глядати, што можуть выхосновати проти Ісуса, коли його поїмають на слові. А они, може зо страху перед простым народом, лем у своїм сердці говорять: Він говорить богозневажливо. Тадь хто може одпущати гріхы окрем самого Бога?

Но то, што сі думали, же є безпечно скрыте в глубині їх сердця, Ісус робить явным про вшыткых. Так, як Ісус видів віру тых людей, і одкрывать єй перед іншыма, так само видить і злобу сердця фарізеїв і учітелів закона, і одкрывать перед вшыткыма.

Тым хоче повісти і нам, же Ісус Хрістос познать таємности нашого сердця. Коли сі думаме, же нихто нас не видить, но памятайме, є Хтось, хто нас видить. Тогды, коли із нашых сердець ся тисне на верьх бунт проти Бога, кедь не розумиме таємностям Божого Провидіня, або коли погорджуєме нашыма ближніма, хоць з вонкашнього їм проявляме як бы почливость.

А тогды звучать і про нас тоты слова в таємности нашій душі: Чом так плано роздумуєте у своїх сердцях? Но, кедь ся не поучіме із того, тогды зазвучать тоты слова при страшнім суді, але явно перед вшыткыма: Чом сьте так плано роздумовали у своїх сердцях? Слава Ісусу Хрісту!

В неділю, 24. юла 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 24. юла о 12.00 год. і 25. юла о 2.00 год. за русиньскым часом.