«Слово» – 7-ма неділя по Сошествії Святого Духа – неділя, 9.00 год.

Коли Ісус вєдно зо своїма учениками ішов по дорозі, двоми сліпы, коли ся дочули, же Ісус переходить, зачали кричати: Ісусе, Сыну Давіда, розмилуй ся над нами. А Ісус ішов далше, а кедь вошов до дому, тоты сліпы приступили ку Ньому.

Він ся звідує: Вірите, же можу тото зробити? А они одповідають: Віриме! А Ісус їм повів: Най буде так, як сьте увірили. А їм ся отворили очі, і они провиділи. Чом Ісус давать їм тот вопрос? Ці вірите, же я можу тото зробити?

Ісус предці знав, што ся одбывать в їх сердці, же они пришли з віров. Же у своїм внутрі они справды вірять, але Він хоче указати їх велику віру і тым, котры той віры не мали. А тыж тоты слова адресує і нам: Вірите?

7Мы называме ся віруючіма. Повіме собі, тадь ясно, же віриме. На тых сліпых хоче нам указати на іншу сліпоту – сліпоту душы. Тоту діавол наводить на чоловіка через приємность роскоши, гріха, клам богатства, через різны єресы – блудны наукы, котрыма хоче одтяхнути од Бога, захасити жыву віру в душі. Здравый зрак – то є добрый жывот подля Божых заповідей а здрава наука віры.

Уж од початку Церькви діавол пробовав тыма блудныма науками навести духовну сліпоту. Тоты блудны наукы напрямив проти віры в божество Хріста а проти Його слова. Прото Бог посылав святых отців, котры ся сходили на вселенькых соборах. Дмешня неділя нам припоминать шість такых соборів, на котрых выголосили: Ісус Хрістос є правдивый Сын Божый, котрый ся став чоловіком, не переставши быти Богом. Котрый мать дві природы і дві волі – Божу і людьску.

А нам говорять: тоту віру собі храньте а ничім собі єй не дайте взяти. Ани выгодами з боку того світа ці моцных того світа ани їх грозьбами а таксамо ани різныма блудныма науками, котры неґують або перекручують боже слово гасять жыву віру в сердцях. Все майме перед собов тоты слова з днешнього слова: Вірите? Тогды укажте тоту віру і ділами вашого жывота. Слава Ісусу Хрісту!

В неділю, 23. юла 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 23. юла 2023 р. о 12.00 год. і 24. юла 2023 р. о 2.00 год. за русиньскым часом.