«Слово» – 8-ма неділя по Сошествії Святого Духа – неділя, 9.00 год.

Вчерашнє Євангеліє нам говорить о важности і одповідности за нашы слова. Ісус Хрістос говорить: з повноты сердця говорять уста. І додав: з каждого даремного слова, котре люде речуть, дадуть рахунок на послідній день. А тыж: бо зо своїх слов будеш оправданый і зо своїх слов і одсудженый.

В першій книзі Кроник чітаме о такій події: В часі царьованя царя Давіда, йому донесли, же Амонітьскый царь Наас умер. Накілько за свого жывота зробив Давідови много добра і мав з ним прятельскы одношіня, Давід выслав своїх высланців, жебы його сынови Ананови, котрый став царьом по своїм отцьови, принесли потіху над стратов отця.

Коли высланці вступили на амонітьскы землі, тогды начальникы нового царя Анана пришли ку ньому і повіли: ці справды сі думаш, же тоты высланці ідуть прославити твойого отця і тобі принести потіху? Та де, они ту ідуть зато, жебы розвідати землю і нашы слабы місця, жебы нас напасти і нашу землю захопити. А молодый царь увірив тым начальникам і їх словам, а дав закликати тых высланців, оголити їм до половины бороды і розрізати їх облечіня, і так пониженых і высміяных їх одослав од себе.

Коли Давід дізнав ся, наказав їм перебыти в Єріхоні, покы їм волося не доростуть і так прийти ку ньому, но не робив ниякых планів напасти на Анана. Но тот царь і начальникы як сі усвідомили, што зробили, выслали много злата і стрібра арамайскому царьови і далшым окололишнім царям і зромадили войско. Як царь дочув ся, дав наказ приготовити ся до боя. А выслідок быв страшный, велике кровопроллятя. А вшытко зачало тым словом: ці справды сі думаш, же они ідуть прославити твого отця?

Другый приклад выхоснованя голосу є розбійник на кресті. Выпустив барз маленькый голос. Голос не обвиньованя, не бунту, але признаня собі свойой вины і просьбов о спомянутя в Царьстві Хріста. А чує одповідь: амінь говорю ті, днесь будеш зо мнов в раю.

Посмотьме на фарізеїв, учітелів закона, архієреїв, котры были свідками Ісусовых чудесных діл, котры не могли поперти, але старають їх зневажыти тым, же якбы признали, же Ісус робить чудесны діла, але такой за тым додали: тот чоловік не є од Бога. А ідуть іщі далше: Коли виділи, як выганять демонів, тыж не могли повісти, то не є правда, бо народ бы їх высміяв, тадь были свідками.

Но говорять: но є то правда, же выганять злых духів, но Він то робить за помочі діавольской, Він є общником злого духа, не вірьте йому. А так посіяли похыбованя в сердцях многых, жебы не увірили в Хріста. Так слово принесло таку велику шкоду.

Дорогы радіослухачі, най то є напомянутя і нам. Слово є Божым великым даром, но за нього є одповідность. Може оно принести великый хосен, як принесло слово учеників, і шли і проповідали, приводили ку Хрістови. Так може принести хосен і наше слово, і ближнім і нам самым. Але тыж може принести много шкоды, велику біду нашым ближнім і нам самым. Бо зо своїх слов будеш оправданый і зо своїх слов будеш одсудженый. Слава Ісусу Хрісту!

В неділю, 26. юла 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 26. юла 2026 р. о 12.00 год. і 27. юла 2026 р. о 2.00 год. за русиньскым часом.