Голосник

«Слово» – Чудеснe дiло Архангела Михаіла – неділя, 9.00 год.

Вчерашнього дня сьме праздновали память чудесного діла святого Архангела Михаіла в Хоніх або Колосах. Коли святы апостолы Йоан і Філіп проповідали євангеліє в Єраполи у Фріґії, своїма молитвами зничіли ідольскый храм, де приношали жертвы змії, котру тримали за бога.

Кедь одходили з Єрапола, пришли на недалеке місце, і пророковали, же ту буде істочник чудотворной воды. Так і стало ся. Зо землі зачав вытікати істочник воды, котрый выздравляв многых. Тыж там была выздравлена дівка єдного погана, котрый на тім місці дав выбудовати церьков в честь святого Архангела Михаіла.

При церькві жыв єден подвижник Архіп. Погане ненавиділи Архіпа і церьков, бо много поганів обертало ся ку Хрістови. Прото вырішыли зничіти тото місце, і Архіпа убити. Пробовали різны способы, но не могли йому нич зробити. Наконець задумали залляти тото місце водов рікы, котра текла недалеко. Но Бог послав святого Архангела, котрый зробив знак Святого Креста над близков скалов, і вода вошла до той скалы, а місце было сохранене.

Тота подія і нас учіть, же кедь Бог є з нами, не мусиме ся бояти ничого. Хоць якбы неприятелі тілесны або духовны хотіли нам зробити зло, а то головно нашій душі. Хоць тот світ намагать ся тримати нас в страху, в непокою. Но нич не може зробити.

А Бог кажде зло оберне на добро тым, котры Його люблять. Так як і тот злозадум тых поганів обернув на добро, бо іщі веце їх увірило в Хріста. А так нам треба лем довіряти Господу, а не бояти ся. Кедь Бог з нами, хто протів нас? Слава Ісусу Хрісту!

В неділю, 20. септембра 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 20. септембра о 12.00 год. і 21. септембра о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Avatar

Коментарі