«Слово» – Неділя мясопустна – неділя, 9.00 год.
Третьов недільов приготовляючов нас до Великого посту є Неділя мясопустна або і Неділя страшного суду. Євангеліста Мафтей нам записав Ісусовы слова о другім приході. Кедь пише: Кедь Сын чоловіка прийде у своїй славі зо вшыткыма святыма ангелами і засяде на престол свойой славы, і зыйдуть ся перед нього вшыткы народы. І одділить єдных од другых. Вівці на праву сторону і козлів на ліву.
Тым, што будуть на право повість: Подьте благословлены мойого Отця, будьте наслідниками Царьства, про вас приготовленого од основаня світа. А тым на ліво: Ідьте од мене прокляты до огня вічного приготовленого діяволу і його ангелам. І потім додав: Бо я быв голодный, затлітый, хворый, у вязніці. А вы сьте мі послужыли, а другы, вы сьте мі не послужыли. Кедь ся зачнуть єдны і другы оправдовати: Господи, коли же сьме тя виділи, а сме тобі послужыли? Ці коли сьме тя виділи.. і сьме ті не послужыли? На што їм одповість: Правду вам говорю, што вы зробили єдному із тых моїх найменшых братів, мі сьте то зробили. А што вы не зробили єдному із тых моїх найменшых братів, ани мі сьте то не зробили.
Кедь чітаме тоты слова, можеме видіти, же тов прімарнов причінов приходу Хріста є выповнити обіцянку, о котрій говорив апостолам: В домі мойого Отця є много бываня, кедь бы так не было, я бы вам повів, іду вам приговити місце. А як вам приготовлю місце, знову прийду і возьму вас ку собі, жебы і вы были там, де і я єм. Слова – Подьте благословлены… будьте наслідниками Царьства приготовленого про вас од початку, суть в ґреческім языку клірономісате – то є Вам належыть небо подля права. Вы сьте його законныма властниками, теперь будете його хоснователями. Вшытко богатство неба є теперь ваше, хоснуйте його на цілу вічность. А коли говорить ку тым на лівій стороні, там чуєме: Ідьте од мене прокляты.. А де? Там, де было притовлено не про вас, но про діявола, вы сьте сі выбрали його частку. Я про вас приготовив небо, вшыткы блажености неба на вас чекали, но вы сьте одшмарили тото вшытко і мене самого, а ішли сьте за моїм противником. Теперь ваша частка буде з ним. Значіть Ісус ту лем конштатує факт выберу тых, што суть на лівій стороні.
І так днешнє слово і нас напоминать: памятати на тот день при каждім слові, ділі, думці. Бо тым мы самы рішаме ся, на котру сторону ся даваме. Прото выхоснуйме тот земный короткый час, жебы сьме в часі його другого приходу, могли і мы учути: Подьте благословлены… Слава Ісусу Хрісту!
В неділю, 3. марця 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 3 марця 15.00 і 20.00 год. і 4 марця о 2.00, год. за русиньскым часом.
Фотоґрафія: Русинова Поляна (Русинка, Русинівка, Русинова Яворина) в Татрах. Жрідло: wikipedia
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Повязаны дописы
Ґорлиці 106,6 MHz
