«Слово» – Неділя мясопустна – неділя, 9.00 год.

Неділя мясопустна або неділя страшного суду говорить нам о другім приході Хріста. Ісус прийде у великій славі зо вшыткыма ангелами, жебы каждому оддати подля його діл. Бо зберуть ся перед нього вшыткы народы.

Будуть одділены єдны од другых. Тым на парвій стороні повість: Подьте, благословлены мойого Отця, будьте наслідниками мойого Царьства. А тым на другій стороні: Ідьте од мене прокляты до вічного огня. А потім додавать: Бо я быв голоден, затлітый, хворый у вязніці, нагый, подорожный, а єдным повість, вы сьте мі послужыли, а другым, вы сьте мі не послужыли.

Кедь ся будуть єдны чудовати над тыма словами а другы глядати оправданя словами: Коли? Ісус повість: Все, коли вы то зробили моїм братам, то вы зробили мі. А як вы то не зробили, ани мі сьте то не зробили. А іщі додавать важны слова. Проклятым говорить: Ідьте од мене до вічного огня приготовленого діаволови і його ангелам. Ісус як бы їм тыма словами повів: Не про вас єм приготовив тото нещастя, не была моя воля, жебы сьте так допали. Про вас єм сотворив рай. А кедь сьте послухали злого , збунтовали ся, сам єм зышов і дав вам спасительны слова, за вас єм проляв свою кров. Отворив єм небо. А вы собі выбрали діавола і ад. Теперь я решпектую ваш выбор.

Дорогы в Хрісті, кедь чуєме тоты слова, проникать нас страх. Але не страх є цільом днешньой неділі, но якраз наопак радость, же Хрістос прийде по своїх выбраных. Іщі маме час, выхоснуйме, не прогайнуйме, жебы сьме належали ку тым, ку котрым ся ніжно і ласкаво Господь озве: Подьте, мої любы.

А кедь прогайнуєме тот спасительный час, втогды буде даремне наше намаганя ся оправдати. Прото приймеме тото Боже позваня, котры нам днешньов недільов Господь адресує: Будьте мі вірныма, жыйте подля моїх заповідей. Жыйте в любви ку мі і ближньому. Слава Ісусу Хрісту!

В неділю, 27. фебруара 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 27. фебруара о 12.00 год. і 28. фебруара о 2.00 год. за русиньскым часом.