Голосник

«Слово» – Неділя по Воздвиженії Честного Жывотворящого Креста – неділя, 9.00 год.

Днешньов недільов ся закінчує праздник Воздвиженія Честного Креста. Цілый тыждень по нашых церьквах быв выставленый Святый Крест. То выложіня креста нам припоминать не лем побіду Креста. Але тыж вызывать ку рішіню брати на себе нашы каждоденны кресты а іти за Хрістом.

Ку тому нас позывать і днешнє Євангеліє, в котрім Ісус позывать: хто хоче іти за мнов, най одшмарить самого себе, возьме свій крест і мене наслідує. Ісус давать і ту слободу: хто хоче. Не насилує, але позывать. А послухати тото позваня а наслідовати Хріста на дорозі креста выжадує од нас терпезливость і усвідомліня, же Хрістос є з нами.

Такым прикладом є святый Євстатій і його родина. Перед тым вызначный воєвода Плакіда, котрого ся бояли неприятелі Рима, а коли раз ся йому Ісус появив меджі рогами оленя, він увірив, дав ся покрестити і прияв імя Євстатій. А прияв не лем крещіня, но і позваня нести крест. А не быв з того людьского погляду легкым. Стратив і жену і дітей, сам жыв як барз бідный у єдного господаря. А аж пятнадцять років. Він тото вшытко зношав терпезливо з одданостьов до Божой волі. Втогды дав його імператор Траян глядати, а як го рабы нашли, вшыткы жытелі того села были ужаснуты, як великого чоловіка мали меджі собов, а они то не знали. Він їх заспокоїв а вернув ся до Рима. Переміг неприятеля, а як ся вертав до Рима, не знав, же там суть і його сынове і його жена. Так їх дав Господь довєдна, жебы прияли за несіня свойого креста одміну мученицького вінця. Бо кедь не хотів принести жертву, быв вєдно зо женов і сынами одсудженый уж новым цісарьом Адріяном на смерть.

Най приклад св. Євстатія, котрый з таков терпезливостьов ніс свій крест, а то так довгый час, буде мотіваціов і про нас брати нашы кресты без наріканя і скаржіня може і на самого Господа, чом мене тото або то постигло, але словами Господи най діє Твоя воля – каждый вшытко приїмати. А памятати і на слова Господа: Я з вами по вшытки дні. Слава Ісусу Хрісту!

А і кедь на даякый час ся може видіти, же зло мать якбы побіду, коли сьме на стороні Хріста, сьме на стороні вічного Побідителя. Слава Ісусу Хрісту!

В неділю, 4. октобра 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 4. октобра о 12.00 год. і 5. октобра о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі