«Слово» – Неділя сліпого – неділя, 9.00 год.

Днешня неділя є послідньов в Пасхалнім часі. В Четверь уж маме праздник Вознесенія. Называть ся і Недільов сліпого. А то од події в днешнім євангелію.

Ісус стрітив чоловіка сліпого од народжіня, котрого выздравлять чудным способом. Плювнув на землю, зробив болота, помазав очі і послав до купальні Сілоам омыти ся. Тот сліпый послухав Його слова і зробив так і не быв збаламученый, вернув ся видячій.

Ісус ту указує, же є тот самый Бог, котрый на початку сотворив чоловіка Адама із пороху землі і вдыхнув йому безсмертну душу. Тото саме робить теперь, кедь плювать на землю, робить болото і робить нове сотворіня очей про сліпого.

В тім сліпым є образ цілой людьской природы, котра одступліньом од Бога перебывала в темноті. А Хрістос пришов дати світло познаня свого божества. І тот сліпый провидів не лем тілесно, але і душевно. Спознавать свого сотворителя і кланять ся йому.

Так нас днешнє слово позывать перебывати у світлі. Хрістос нам своїм терпіньом, воскресіньом і вознесіньом даровав світло, жебы не вертати ся до темноты. В його світлі можеме познавати яков темнотов є, кедь чоловік перебывать в рабстві гріха, роскоші, пожадливости, привязаности ку земному богатству, людьскій славі. Хрістос воскрес!

В неділю, 24. мая 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 24. мая о 12.00 год. і 25. мая о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА