«Слово» – Неділя сліпого – неділя, 9.00 год.

Днешня неділя, котра ся называть Неділя сліпого од народжіня, є уж послідньов недільов в пасхалнім часі. Так як і попередні неділі і тота неділя якбы одходить од темы Воскресіня, но кажда з тых неділ мать одношіня ку празднику Пасхы.

Першы три неділі нам подавають доказы воскресіня на утверджіня нашой віры у воскресшого Господа. А далшы три неділі нам подавають плоды воскресіня. Неділя розслабленного – дар выздравліня з духовной паралізы гріха через дар святого крещіня і тайну покаяня.

Неділя Самаріянкы – дар жывой воды душам высушованым пожадливостьов і гріхом, подобно як была высушована душа тілеснов пожадливостьов той Самаріянкы. А днешна неділя сліпого говорить о дарованю правдивохо світла душы. З того слова можеме набыти або увидіти конкретны світла. Посмотьме прото на днешнє слово.

Ісус іде з церькви і увидів там недалеко церькви єдного чоловіка, котрый быв сліпый од народжіня. Ту нам слово говорить: Ісус його увидів. Ту є і про нас перше світло, котре нам Господь хоче тым словом подаровати. Ісус увидів: так Ісус видить і нас ці ся находиме в радостных ці смутныь моментах. Видить, коли пережываме радость, коли ся ням легко молить і вірить, но видить і тогды, кедь на душу приходить темнота смутку, болести, трапліня, хвороты ці неуспіху.

Бо праві тогды нам діавол нашептавать: видиш ани Бог на тя уж не памятать. Нашто ся молити, ходити до церькви, нашто ті є вірити?

На тоты покушіня маме засвітити світлом днешнього слова: Ісус його увидів. Далше посмоть, якый хосен можеме іщі набыти, а то зо способу выздравліня сліпого. Ісус то не робить як при іншых выздравлінях, коли повів лем слово ці ся дотулив. Ту робить штось чудне: плювать на землю, робить болото, помазує ним очі, посылать умыти ся.

А коли тот сліпый послухав і зробив, што йому Ісус наказав, вернув ся видячій. Якый хосен є ту про нас із того слова? Чом так Ісус робить? Посмотьме на першы сторінкы Писма, коли Бог сотворив першого чоловіка: бере глину і вдыхне безсмертну душу. Ту робить дашто тому подобне. Глина і слина – і творить цілого здравого чововіка. Ту указав ділом, же є тот самый Сотворитель, котрый на початку сотворив першого чоловіка. Тым ділом говорить, же є тот самый Бог. Хто увидів того сліпого? Сам Бог! Хто видить і нас? Тот самый Бог.

І далше што ся одбыло по выздравліню: Наперед видиме як приходять сусіды. Што ся стало? Як єсь увидів? Образ інтересу видіти або чути дашто нове. Потім фарізеї і архієреї: Хто тобі отворив очі – они заперають очі перед правдов, не хотять прияти а наконець выздравленого выганяють. А іщі родичі того чоловіка – образ страху, жебы не мати проблемы про віру в Хріста. А наконець є ту сам выздравленый, котрый не смотрить ани на тых сусідів, котры лем гладають сензації і дашто нове чути або видіти без наміріня прияти правду.

Не смотрить ани на архієреїв і фарізеїв а ани на страх родичів, жебы не мати проблемы. Він холосить лем єдно: быв єм сліпый а теперь виджу. А на вопрос Ісуса, вириш в Сына чоловіка, одповідать, вірю, Господи. Ту є тот выздравленый прикладом вытырвалости у світлі і про нас. Не оставати лем на поверьху – інтерес о штось нове без глубокого приятя; не заперати очі перед духовным світлом – фарізеї і архієреї а не смотрити на страх з владык того світа. Слава Ісусу Хрісту!

В неділю, 17. мая 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 17. мая 2026 р. о 12.00 год. і 18. мая 2026 р. о 2.00 год. за русиньскым часом.