«Слово» – Неділя жен міроносительок – неділя, 9.00 год

Третя неділя по Пасці называть ся Недільов жен міроносительок і праведного Йосифа. Євангеліє нам наперед говорить о смілости Йосифа із Аріматеї, котрый без страху пришов ку Пілатови, жебы собі выпросити мертве тіло Ісуса.

Євангеліста Марко додавать, же Йосиф быв членом рады, і то достойным. Пілат сі дав потвердити інформацію о смерти Хріста од стотника, а кідь тот досвідчів, дав позволіня поховати тіло. Йосиф купив полотно і ароматы, завинув тіло Ісуса і положыв до нового гробу, вытесаного до скалы. Скоро рано потім жены, котры спроваджали Ісуса в часі його діялности і допомагали в денноденных потребах, не охабили го ани під крестом. Ученикы ся розутікали аж на Йоана. Но тоты жены перебыли із ним аж до кінця а іщі і по похованю хотять му дати послідню честь, накупили ароматы і ідуть ку гробу, жебы помазати мертве тіло. Наповнены болістьов, жальом, неістотов і страхом. Як ся їм удасть выконати тото діло? Як своїма слабыма женьскыма руками одвалять камінь, а то іщі не знали о сторожи при гробі? Но наперек тому любов ку Хрістови была векша як вшыткы тоты арґументы, котри говорили проти них. І як пришли ку гробу, на їх велике зачудованя быв камінь одваленый. Коли вошли до гроба, нашли там ангела, котрый їм говорить: Не бійте ся, глядате Ісуса Назаряна роспятого? Не є ту, вокрес! Ідьте росповідайте тоту новину його ученикам і Петрови. Они наповнены великым страхом, ужасом і радостьов втікають од гроба. І сам Господь ся їм появив і звістує їм: Радуйте ся!

Они ідуть плачучі, глядаючі мертвого, но вертають ся наповнены радостов, стрітивши жывого воскресшого Хріста. Они ідуть помазати міром мертвого, а самы суть помазаны Жывым. Їм першым є звістована радостна новина о воскресіню. Намісто болести і плачу ся їм звістує радость. А они і звістують тоту радость ученикам.

І мы наслідуйме тоты святы жены! Звістуйме нелем нашыма словами, але головно нашым жывотом цілому світу тоту радостну новину, котра вшытко мінить! Мінить погляд на світ, на матеріалны добра, на терпіня і на саму смерть. Тота новина є: Хрістос воскрес!

В неділю,  12. мая 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 12. мая 15.00. і 13. мая о 2.00, год. за русиньскым часом.

фото: Ікона жен міроносительок в гробі Хріста, Росія, остров Кижи, ХVIII. ст., wikipedia