Слово» – 2-га неділя по Сошествії Святого Духа – неділя, 9.00 год.

Ісус Хрістос іде ку Ґалілейскому морю, жебы покликати собі першых учеників. Не іде до Єрусалима, меджі штуденстів теолоґічных і фарізейскы школ, жебы выбрати тых наймудрішых, найліпшых. Не хоснує тоты земны крітерії, але іде выбрати собі людей неуків, простых рыбарів, котрых кличе: Подьте за мнов.

Были то Сімон – Петро, його брат Андрій і далшы двоє братя Яков і Йоан, котрых тыж покликав. А чуєме там слова: Они охабили вшытко і ішли за ним. Они цілый жывот перебывали при воді, ловліньом рыб. А нараз приходить учітель, котрый їх кличе. Они не знають, што їх чекать. Ідуть до не знамого,.

В тім часі было много учітелів, передводителів, котры кликали собі учеників, а не скінчіли славно. Ани тоты бідны рыбарі не знають, якый буде їх жывот, лем єдно, то слова Хріста – подьте за мнов, їх притяговали ку Ньому, же они вшытко охабили. То апостол Петро нескірше потверджує словами: Смоть, мы охабили вшытко і ішли за Тобов.

Так днешнє слово є про нас такым покушіньом подумати: Добрі, є то покликаня першых учеників. Паралела може быти в теперішнім- покликаня до священства ці монашества. Ту іде о покликаня ку глубшому духовному служіню. А тым якбы перед нашы очі поставити барьєру, тото про мене як звычайного чоловіка, што може значіти. Ку мі тоты слово ся не односить.

Тото покушіня може быти при чітаню Божого слова, же то, што сі думаме, же не є про нас актуалне, жебы перейти далше. Але апостол Павел пише: Ціле святе Писмо є богонадхнене, написане про нас. Чуєме тоты слова: ціле Писмо. І тото днешнє слово є про каждого. Уж то, же Ісус іде покликати звычайных людей, указує, же мож іти за Хрістом в каждім жывотнім ставі.

То не значіть, охабити фізічно родину, дітей, обыстя а іти до семінарії ці до моанстыря, або десь до Африкы за місіонаря. І на тото Бог кличе. Але слово подь за мнов значіть іти за Хрістом всягды в каждім поставліню: Іти жывотом подля Його слова. Подь за мнов. Охаб грішный жывот без мене, а од теперь подь за мнов. Зачний жыти зо мнов. То може каждый.

Святый Василій говорить, же хто жыє без Бога, тратить споїня зо жывотом. Покликаня іти за Хрістом значіть про каждого покликаня ку жывоту. Ку жывоту подля Бога, Його заповідей , Його слова уж ту на землі. А тыж ку жывоту блаженому у вічности. Слава Ісусу Хрісту!

В неділю, 14. юна 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 14. юна 2026 р. о 12.00 год. і 15. юна 2026 р. о 2.00 год. за русиньскым часом.