«Слово» – О выздравліню невладного – неділя, 9.00 год.
Як Ісусу ослободив з рабства діявола овладнутых, о котрых сьме чули минувшой неділі, приходить до свого міста, то є Капернаума, де найчастіше перебывав і зробив найвеце чудесных діл. Там, коли учіть як звычайно в домі, приношають чоловіка паралітіка, невладного, четверо мужів, но кідьже не можуть прийти ку Ісусові про множество народа, выходять на стріху, роблять діру і спущають через отвор перед Ісуса. Ісус видів їх віру. Він проникав глубше, його погляд не зіставав на поверьху, але ішов до глубины душы, видів не лем їх, як спущаюь невладного, але їх віру. Говорить невладному: одпущають ся ті гріхы. Не говорить: єсь выздравелный, але знова Ісусу видить глубше, видить причіну той біы того чоловіка, котрой є гріх. Прото одстранює наперед причіну, а аж так наслідок. Но дакотры фарісеї і книжникы говорять у своїх сердцях: Він зневажать Бога, хто може одпущати на земли гріхы окрім самого Бога? Ісус їм говорить: чом так підло роздумуєте (дословно з ґреческого: ведете діалоґы у своїх сердцях)? Ісус видів до їх внутра і кідь нич не говорили устами. І додавать, жебы вы знали, же сын чоловіка мать на земли владу одпущати гріхы: Встань, берь свою постіль а ідь до свого дому. І невладный так зробив. Днешнє євангеліє нам припоминать тоту велику правду, же Бог видить не лем нашы діла, котры робиме ці слова котры выповідаме, але і нашы думкы, нашы діалоґы сердця, перед ним нескрыты. Прото в 4.-ім псалмі пророк Давід написав: Яже глаголете во сердцях вашых, на ложах вашых умилите ся (што говорите через день у вашых сердцях, за тото на вашых ложках перед спаньом приношайте покаяня). Най тоты слова нам допомагають, абы сьме веце мерьковали нелем на нашы слова ці діла, але жебы сьме мерьковали і на злы думкы а в часі іспыту совісти розоберали нелем што планого сьме через день повіли ці зробили, але і тото, што підлого было в нашых сердцях. Слава Ісусу Хрісту!
В неділю, 31-го юла/липця 2016 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 31-го юла/липця о 12.00, 15.00, 20.00 год. і 1-го авґуста/серпня о 2.00, 8.00 год. за русиньскым часом.
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Фото: Выздравліня невладного в Капернаумі. Жрідло:Wikipedia.
Повязаны дописы
Ґорлиці 106,6 MHz
