«Слово» – Праздник Рождества Ісуса Хріста – неділя, 9.00 год.
Св. Ґригорій Богослов у своїм слові на праздник Рождества Хрістового зачінать словами: Хрістос раждаєт ся, славите, Хрістос з небес, срящите, Хрістос на землі, возносите ся. Тоты самы слова чуєме і в каноні Рождества на утрені.
Они говорять велику правду о тім, же Бог ставає чоловіком. Небо прославять Спасителя через ангелів, котры новину звістують над Віфлеємом пастырям. Они ідуть і находять маленьку дітину і наповнены великов радостьов вертають ся ку своїм стадам. І трьом маґам, но не через ангела, але через звізду. Або через ангела в подобі звізды, котра їх провадить до Єрусалима і потім до Віфлеєма. Они приходять і складають перед дітинков свої дары: золото – як царьови, кадило – як Богу, і миро – як тому, котрый мав умерти за вшыткых людей. Коли хотіли вернути ся назад, уж не звізда, но ангел їх напоминать не вертати ся назад ку Іродови, но іншов дорогов вернути ся до свойой країны. Они, котры пришли з великов славов, теперь утікають як злодії по горах і долинах, утікаючі од Ірода царя. Но несли в собі світло віры.
Бог і нас тым праздником кличе, жебы возносити ся. Троє маґове послухали тото позваня, выдали ся на далеку дорогу, вертають ся іншыма людми. І нас Бог кличе прийти ку Віфлеєму, поклонити ся духовно народженому Спасительови, запалити ся од нього огньом віры, надії і любви, і жыти новым жывотом, не вертати ся до темноты страстей, гріха. Най і тот світлый праздник Рождества, котрый теперь святкуєме, буде і про нас тым позваньом і одповідьов ку новому жывоту. Най нас Новонароджнеый Спаситель наповнить своїм покойом, любвов, радостьов. Хрістос раждається!
В неділю, 13. януара 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 13. януара 15.00 о 20.00 год. і 14. януара о 2.00, год. за русиньскым часом.
фото: Дучо Dі Бонінсеня – Рождество Хріста. Жрідло Wikipedia.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Повязаны дописы
Ґорлиці 106,6 MHz
