«Слово» – Праздник св. Николая Чудотворця – неділя, 9.00 год.

Вчера сьме праздновали память святого Николая. На його день тішать ся молоды і стары. А то про його велику доброту. Но тота його доброта выходила з близкого зъєдиніня з Господом Богом. Од маленька быв послухняный Божій волі.

Народив ся в місті Патара в Лікійсій области. Його стрыко Николай быв там єпіскопом. Він высвятив молодого Николая за священика. Кедь Николай навщівив святы місця, задумовав одыйти до пустыні, жебы там перебывав з Богом. Но Бог йому дав познати, же там не є його місце, але мать ся вернути до свого края. Він послухав тот Божый голос і вернув ся до свойого міста.

Його стрыко там основав монастырь – Святый Сіон, де св. Николай задумовав дожыти в служіню братам, в пості і молитві свій жывот. Но і ту чує Божый голос, котрый йому говорить: Кедь хочеш прияти од мене вінець – ідь до світа про захрану многых душ. Николай одходить до міста Міры, де його нихто не знав. А праві там умер єпіскоп Йоан і Николай быв чудесным способом выбраний на єпіскопа.

Господь його нагородив за його велику любов ку Богу і ближному многыма чудесныма ділами, котры діяли ся іщі за його жывота і по його смерти.

В часі переслідованя хрістіанства быв запертый до вязніці на довгый час. І тото місце выхоснує на оголошаня Божого слова. По ослободжіню вертать ся ку звіреным душам. Бере участь і на 1-ім Нікейскім соборі. Там запаленый за віру в божество Хріста сміло противить ся і Аріови – єретікови, котрого вдарив за його безстыдность по лиці. Зато быв вылученый зо Собора і позбавленый єпіскопской достойности. Но сам Господь і Пресввята Богородіця привертають йому в поданю євангелія і омофора тоту достойность. Коли вернув ся ку своїй пастві мозолив іщі много за спасіня людлскых душ і так перешов по вічну нагороду.

Учме ся од святого Николая той доброты, любви, слухняности Божій волі, котра выходила з любви і узкого споїня з Господом Богом. Слава Ісусу Хрісту!

В неділю, 20. децембра 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 20. децембра о 12.00 год. і 21. децембра о 2.00 год. за русиньскым часом.