«Слово» – Праздник свв. апостолів Петра і Павла – неділя, 9.00 год.

Праздник святых верьховных апостолів Петра і Павла нам кладе перед очі тых двох великых апостолів. Петро, котрый звав ся Сімон, быв рыбарьом. Ісус Його покликав за апостола і назвав Петром.

Мав щіру любов ку Хрістови. Кедь Ісус говорить о своїх страстях, Петро йому вытыкать: Tото ся з тобов не сміє стати. Но Ісус Його напоминать:  Боч од мене, сатане, бо не думаш на тото, што Боже, але на людьске.

Петро быв при вызначных подіях: воскресіня Яіровой дівкы, переображіня на Таворі ці в Ґетсіманьскій загороді. Но тыж є в жывоті момент, кедь ся пошпотив. Ісус йому тото передповів, но Петро не увірив, же ся то стане. А предці Петро трираз одрік ся при Хрістовых страстях, но потім щіро каяв ся.

А Ісус по воскресіню потверджує , же му одпустив троїтым вопросом: Любиш мене? На што Петро одповідать: Ты Господи знаш вшытко, знаш же тя люблю.

По сошествію Святого Духа ревно проповідать євангеліє і наконець умерать як мученик за Хріста. Быв роспятый, але долов головов, бо ся не чув за достойного умерти так, як сам Господь на кресті.

Павел походив з Тарсу. Од маленька выхованый в Єрусалимі при ногах учітеля Ґамаліїла. Спочатку пронаслідовав Церьков, думав, же є грозьбов про віру отців. Ісус ся му появив на дорозі до Дамаска. А ся го звідує: Чом ня пронаслідуєш? А з пронаслідователя Савла ставать ся апостол, выбрана Божа судина – Павел. Котрый несе Боже слово до далекых країн на своїх місійных дорогах. Котрый горить любвов ку Хрістови а ку тій любви прытігать і другых. А наконець принимать мученицку смерть. Быв стятый мечом.

Павел представлять тых, котры жыють далеко од Бога, або проти нього боюють ці суть холодны у своїй вірі. Ани они не мають іщі заперту дорогу до неба. Бо і з тых савлів можуть стати ся Павлове.

А Петро представлють тых, котры од маленька дістали дар віры, но підлігають покушіням, страстям, привабльованям того світа і падають. Указує на своїм прикладі, жебы ани тогды не падати духом, але покы жыєме, є ту можность покаяная. Можность той зміны, можность знову повстати а іти далше.

Най нам ку тому святы верьховны апостолы выпрошують потрібны благодати. Слава Ісусу Хрісту!

В неділю, 18. юла 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 18. юла о 12.00 год. і 19. юла о 2.00 год. за русиньскым часом.