«Слово» – Праздник святого Йоана Златоустого – неділя, 9.00 год.

Свята Церьков праздновала вчера великого святителя, великого світилника Церькви, святого Йоана Златоустого.

Народив ся в Антіохії. Його отець Секунд быв начальником міста, но скоро умерать. А так выхованя малого Йоана мать на старости його мати Антуса. Она засівала зерненько Божого слова на плодоносну землю душі Йоана, оно выросло на великый стром, котрый приніс плоды про Церьков.

Молодый Йоан переходить тыж розныма науками, здобываючі знаня того часу. Но спознавать марноту світа і хоче жыти про Бога. Но на пустыні захворів і так мусив вернути ся назад до Антіохії. Ту є высвяченый на діакона, пізніше на священика. Єпіскоп Флавіа йому звірює проповідати в Антіохії. Йоан ту проповідать двадцять років. Народ з великов радостьов і захопліньом приходить на його проповіді.

Слава о Йоанови дішла до Цариграду а імператор Аркадій хотів мати його на патріаршім престолі. Так є Йоан Божым ряджіньом покликаный на патріаршый престол. Вітало його ціле місто на чолі з імператором. Яка велика слава очековала Йоана, но лем на курто. Так як Ісус приходячі до Єрусалима на Квітну Неділю, так і Йоан перебыв на патріаршім престолі 3 рокы.

Його немилосердный постой ку гріху без огляду, ці то было духовенство, ці высокпоставлены урядникы, ці богаты жены, выкликують поступно ненависзть ку Йоанови. А головна цариця Евдоксія досягла у свого мужа Аркадія, же Йоан быв несправедливо на беззаконнім соборі позбавленый уряду і посланый до выгнанства.

Но землетрясіня, котре настало по оході Йоана, брали за знак Божой кары, прото цариця дала наказ вернути Йоана назад. Но недовго перебыв в спокою, знова быв уж дефінітівно посланый до выгнанства, де і по дакількох роках одовздавать свою душу до рук Господа словами: Слава Богу за вшытко.

Якый славный быв Йоан, коли прповідав в Антіохії, якый славный быв його приход до Цариграду. Но якый з того людьского погляду смутный конець. Але Йоан і тогды, коли його хвалили, не выношався, приписовав заслугы Богу. А і тогды, коли зазнавав переслідованя, терпіня і тяжкы часы, дяковав Богу, словами: Слава Богу за вшытко.

Тото і мы учме ся од того великого святителя, великого світильника Церкви. Слава Ісусу Хрісту!

В неділю, 27. новембра 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 27. новембра 2022 р. о 12.00 год. і 28. новембра 2022 р. о 2.00 год. за русиньскым часом.