«Слово» – праздник Успенія, 13-та неділя по Сошетствії Святого Духа – неділя, 9.00 год.

Пережываме праздник Успенія Пресвятой Богородіці. О тім празднику не находиме змінкы у Святім Писмі, но через проповіді отців Церькви і нашы літурґічны тексты можеме поскладати мозаіку, што одбывало ся при кончіні Марії. По вознесіню Ісуса Хріста на небо Марія мала лем єдно желаня – якнайскоріше одлучіти ся од тіла і быти з ним. Пятнадцять днів перед їй успенієм приходить Архангел Гавріїл а звістує їй, же уж є близько тот момент. Она ся приготовлять на свою смерть з великов радостьов. Бог посылать апостолів, котры были поросходжаны по світі, чудесным способом на хмарах до Єрусалима, жебы были свідками їй смерти. Сам Госдподь Ісус приходить з ангелами і святыма, жебы прияти їй душу. Яка блажена была кончіна Марії. Но днешній праздник і нас позывать ку тому, жебы собі усвідомити, як важно є приготовляти ся на тот момент. Добрым хрістіаньскым жывотом, каждый день быти в зъєдиненю з Богом, робити вшытко на його славу, втікати од гріха як найвекшого зла, што нас може позбыти вічной блажености. Жыти в любви з Богом і ближныма. Потім і наша кончіна буде блаженов, радостнов. За котров буде слідовати воскресіня при другім приході Хріста і прославліня зо святыма. Просьме Пресвяту Богородіцю, жебы нам ку тому выпрошала благодати. Слава Ісусу Хрісту!

В неділю, 3. вересня/септембра 2017 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 3. вересня/септембра 2017 р. о 15.00, 20.00 год. і 4. вересня/септембра0 2.00 год. за русиньскым часом.

Фото: Праздник Успенія в Чірчу. Автор: Петро Басалыґа.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА