«Слово» – Праздник Успенія – неділя, 9.00 год.

Днешній праздник Успенія нам указує на Пресвяту Богородіцю, на закінчіня їй жывота. Як при початю Ісуса Хріста Бог посылать архангела, так і при заснутю свойой матери є посланый подля традіції ангел, котрый звістує їй преход до неба. Тропарь говорить, же Марія є Матірь Жывота – друга Ева. Перша Ева – Жыва, стала ся матiрьов смерти, коли послухала порады злого і рядила ся його словом. Так зо Жывой – Евы, стала ся мертва. Друга Ева ся рядила словами Господа. Не слухала рады злого. Їй проґрам цілого жывота быв в тім, жебы слухати слово Боже, його сохраняти у своїм внутрі і воваджати до жывота. Она все одповідать на Боже слово: Най буде мі подля твойого слова. Най діє на мі Твоя воля. Тото є проґрам, ку котрому Марія запрошать і нас, жебы і наша смерть была тым тихым заснутьом і переходом до вічной радости в небі. Слава Ісусу Хрісту!

В неділю, 28-го авґуста/серпня 2016 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 28-го авґуста/серпня о 12.00, 15.00, 20.00 год. і 29-го авґуста/серпня о 2.00, 8.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: Ел Ґреко – Успеніє. Жрідло:Wikipedia.