«Слово» – Праздник Воскресенія – Пасха – неділя, 9.00 год.

Хрістос воскрес! То слово радости, котре днешній день звучіть цілым хрістіаньскым світом. Бо цілый світ єдностни прославлять Воскресіня Хріста.

Пережыли сьме страстный тыждень. В першых трьох днях сьме могли чути остатні слова, якбы тестамент, або згорнутя Євангелія ку народу. А іщі звучать Його слова, но лем ку ученикам на Тайній вечері, а наступив час терпіня. Тот, котрый зробив тіьлко добра. Выздравив много людей, з многых выгнав демонів, теперь стоїть перед жыдівсков радов а потім перед Пілатом. Жыде обвинюють з порушіня закона, а перед Пілатом, же бунтує народ проти влады Рима.

Ісус стоїть тихо. Терпезливо зношать раны слов, потім і раны по твари, плюваня, бичована, терньом вінчаня а наконець крест. Іщі і під крестом ся му высмівають, а Він молить ся. Його тіло кладуть до гробу. Начальникы Ізраіля суть заспокоєны, досягли свого. Збыли ся Ісуса. Але і то є про них мало, же Його тіло зложыли до вытесаного гроба. Ідуть за Пілатом а дожадують ся вартовати гроб. Жебы не пришли ученикы і не украли го.

Но даремны суть їх намаганя. Приходить недільне рано. Тот Великдень. А через слабенькы жены, але силны любвов ку Хрістови, котры ідуть помазати Його тіло, зазвучіти цілому світу: Воскрес, не є ту, говорить їм ангел при гробі, котрый одвалив камінь.

Ісус вышов через запечатаный гроб, не потребовав, жебы му ангел одвалив камінь. Тото ся діяло про жены, а про варту, котра дозерала гроб, жебы нихто не мав выгварьку. І нам звучіть тота радостна новина. Наше богослужіня на утрені в тім прекраснім каноні преподобного Йоана Дамаскина нас позывать ку тій великій радости: Воскресенія день – просвітим ся людиє, Пасха Господня, Пасха – од землі к небесі, од смерти ко жизні Хрістос Бог нас приведе, побідную поюще.

Днесь є Воскресіня день, будьме у світлі. Смуток уж не мать місце. Хрістос нас перевів од землі ку небу. Є про нас одкрыте небо. Од смерти ку жывоту. Смерть уж стратила силу. Хрістос нам подаровав свою побіду. Хрістос переміг смерть, гріх і діавола. Каждый може набыти вічне спасіня.

Воскресіньом Хрістовым вшытко набывать новый погляд. Наш жывот, трапліня, болести, проблемы і наша смерть. Прото з радостьов не лем на устах, але і в сердці, і цілов нашов бытностьов здравкайме ся тыма словами: Хрістос воскрес!

В неділю, 20. апріля 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 20. апріля 2025 р. о 12.00 год. і 21. апріля 2025 р. о 2.00 год. за русиньскым часом.