«Слово» – Праздник Воздвиженія Честного Креста – неділя, 9.00 год.

Свята Церьков ставить перед нас далшый із великых праздників. Праздник Воздвиженія Честного Креста. Є то праздник радостный. Вказує нам на побіду Хріста, котру довершыв через Крест.

Із знаку смерти, понижіня, проклятя, став знак радости, побіды, знак жывота. Святый Крест быв передображений уж в Старім завіті – Мойсей вдарив воды Червеного моря знаком креста. Ці выставив мідяного гада на пустыні, і каждый, хто посмотрив на тот знак, зістав жыти, хоць быв покусаный гадами, котры на них нападали. Выбраный народ путовав по пустыні на способ креста. Чом свята Церьков праздниує його возвигнутя? Діавол ненавидить Крест. Через імператора Адріана дав зничіти Єрусалим і дав збудовати на святых місцях храмы поганьскым ідолам і наказав приношати там скверны жертвы, жебы так вытерти із памяти спомінку на тото святе місце. І над місцьом, де ся находив крест, приношали скверны жертвы нечістого култу. Но переходить час і Бог вказує Крест світу через св. Єлену, котра нашла Святый Крест а патріарха Макарій го выздвигує і благословить вшыткы світовы стороны. Жебы так сімболічно вказати, же хоць быв Крест скрытый, хоць над ним ся высмівали, нич не затінило його слову і його побіду. І про нас є прото тот праздник радостным. Вказує нам на побіду Креста. Коли смотриме і приходиме в тых днях його ціловати, не заставуйме свій погляд лен на ним самім, але поздвигнийме свій погляд высше. Крест вказує неле на Ґолґофту але і на Воскресеніє. Вказує і на наше воскресіня при другім приході Хріста. І втогды появить ся знак Сына чоловіка – Святый Крест. Най буде і про нас знаком радостным уж ту на землі і при другім приході Хріста. Слава Ісусу Хрісту!

В неділю, 29 септембра 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 29 септембра о 12.00 і 30 септембра о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА