«Слово» – Праздник Вознесенія – неділя, 9.00 год.

Другым праздником по празднику Пасхы є праздник Вознесенія. Ісус Хрістос 40 днів пребывав зо своїма учениками. Учів їх о Божім царьстві, приготовляв їх ку їх посланю проповідати євангеліє цілому світу.

На 40-ый день вышов із нима на Оливну гору. Там їм давать послідні наказаня: іти до цілого світа, прповідати, крестити а учіти. А притім додавать: Дана мі є вшытка міць на небі і на землі. А додав: Я з вами по вшыткы дні аж до кінця світа! Потім їх благословив і возніс ся до неба.

Кедь апостолы смотрять за ним, ангел ся появлять, і їм напоминать: Чом стоїте і смотртите до неба. Тот Ісус знова прийде. Ту є даный проґрам і про нас: не стояти, а не смотрити зо смутком ку небу. Але свої очі мати напрямены ку небу а рукы ку діялности, ку творіню добрых діл.

Теперь є час роботы. Выхосновати каждый день на шыріня Божого царьства в моїм жывоті, в моїй родині, оточіню, де ся находжу. Коли прийдуть тяжкы моменты, не падати на духу до безнадійности, але тримати ся слов: Я з вами.

Мы не самы. Ісус Хрістос, котрому вшытко належыть, є з нами. Тогды не будеме підлігати ідолу страху, котрый хоче тримати в рабстві. Але жыти в радости. Правда, кедь выповниме тоты Ісусовы слова: жыти подля євангелія каждый день і дотримовати вшыткы заповіді. Ангел говорить: Тот Ісус знова прийде.

Тоты слова най і нас мотівують як найліпше выхосновати тот земный час, жебы як прийде Господь сьме были приготовлены і могли чути слова: Подьте благословлены до мого царьства. Слава Ісусу Хрісту!

В неділю, 13. юна 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 13. юна о 12.00 год. і 14. юна о 2.00 год. за русиньскым часом.