«Слово» – Рождество св. Йоана Крестителя – неділя, 9.00 год.

Того тыждня сьме праздновали праздник Рождества св. Йоана Крестителя. Євангеліє праздника нам розповідать, што ся стало перед і при його народжіню.

Його отець Захарія быв священиком, мати Єлисавета была із Аронового роду. Кедь мав Захарія службу в храмі, появив ся му архангел Гавріїл, котрый му звістує радостну новину, же буде отцьом дітинкы. Але дітинкы, котра буде опередником Спасителя світа. Но Захарія не увірив. Гавріїл йому повів: так тогды онімієш, аж до часу, покы ся то не стане. Ты не увірив моїм словам, котры ся сповнять, як прийде час. Захарія такой зістав німый.

Кедь ся дітина народила, хотіли єй назвати подля отця. Але выпроисив собі таблічку, де написав: Йоан буде його імя. А його язык ся розвязав, і він зачав бісідовати. А што веце, зачав пророковати о Йоанови, же буде Господнім пророком і опередником.

Дорогы радіослухачі, поучіня про нас із днешнього слова: Боже слово не є людьске слово. Як прийде час, оно ся наповнить. Ай кедь ся видить, же то так не є, або тыж, же нич тому не насвідчує.

Ісус Хрістос ясно повів: Небо і земля перейдуть, але мої слова не перейдуть. А не помине ани єдна чарочка, покы ся вшытко не стане. Захарія не увірив, пересвідчів ся на собі, же не мать похыбовати о Божім слові. Прото мерькуйме, не погорджуйме Божым словом, не легковажме го про нашы людьскы арґументы. Они не обстоять. Бо кедь підлягнеме тому покушіню невірьства, людьскых арґументів, може ся стати, же ся і мы пересвідчіме, але буде пізно.

Просьме святого Йоана, най нам выпрошать дар віры, жебы сьме не похыбовали о словах нашого Господа, але щіро їх прияли а подля них і жыли. Слава Ісусу Хрісту!

В неділю, 11. юла 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 11. юла о 12.00 год. і 12. юла о 2.00 год. за русиньскым часом.