«Слово» – Святый апостол Тома – неділя, 9.00 год.

Святый апостол Тома быв єдным із 12 апостолів. По воскресіню Господа Ісуса, не быв там, як ся Ісус появив апостолам. Хоче ся пересвідчіти. Покы не дам свій палець до ран од клинців і свою руку не вложу до його ребра, не буду тому вірити.

Коли ся Ісус знова появив апостолам, быв там і Тома. А Ісус позывать Тому: Подь, дай свій палець до ран од клинців і свою руку до мого ребра, а не будь невіруючій, але віруючій. А Тома скричав: Господь мій і Бог мій.

Тота віра Томы была щіра, він справды увірив, же Ісус воскрес. Тото невірство Томы Господь допустив, жебы Тома став свідком воскресіня про іншых. Жебы нхто не міг повісти, же може апостолы сі выдумали. Тома ся пересвідчів і так о тім свідчів.

По Сошествію Святого Духа проповідать Євангеліє в Індії. Там єден царь хотів поставити собі прекрасный палац. Томови давать велике множество золота на будованя. Тома го роздав бідным. Кедь ся царь дізнав, дав го заперти до вязніці. Брат царя, коли умер, увидів прекрасный небесный палац, збудованый апостолом. Так ся просить вернути назад і купити у брата палац. Тогды быв Тома выведженый із вязніці. Проповідать обидвом, царьови і його братови євенгеліє, они з радостьов приїмають а наконець їх крестить. Сам іде прповідати до далшых міст. А наконець умерать мученицков смертьов.

Апостол Тома нас учіть, же коли робиме добро другым, робиме го собі. Будуєме собі небесный палац. Ісус сам тото приїмать а обіцять велику нагороду. Просьме тоды того великого Апостола, жебы нам выпрошав благодати на тото памятати а покы маме час робити добро, выявляти діла милосердя ці тілесного або духовного нашым билжнім. Жебы так раз чути од Господа слова: Подьте благословлены до мойого Царьства. Слава Ісусу Хрісту!