«Слово» – Третя постна неділя – неділя, 9.00 год.

В третю посту неділю нам св. Церьков ставить перед нас святый крест, котрый є нам на посилніня в нашім постнім подвигу. На початку дорогы ці даякого діла чоловік чує в собі достаток силы легко ся зачінать, но поступом часу є все менше. Так є і з нашов дорогов посту, як приходиме до середины того сятого часу, кідь то чоловік бере важно, може приходити на нього покушіня ці нашептованя діявола ку полегчіню, духовній лінивости. Прото Ісус в днешнім євангелію ку нам говорить хто хоче іти за мнов – давать нам слободу выберу. Най одрече ся, дословно одвергне самого себе – значіть старого чоловіка, одвергне злы думкы, привязаности, страсти, і вшытко, што творить старого чоловіка в нас. Най возьме свій крест і мене наслідує. Значіть най прийме з Божых рук вшытко як праведный без наріканя і іде дорого за Хрістом. Най не слухать злого. А далше Ісус додавать: бо якый хосен є з того дочасного, коли чоловік утратить вічне? І так вказуючі на крест – не як знак понижіня, болести ці терпіня, але як знак побіды нас Ісус позывать іти далше по дорозі ку Пасхі нелем той земной, котру будеме онедовга праздновати. Но і той вічной, небесной. Абы не слухати слова діявола, але вірити словам нашого Спасителя.

В неділю, 3. квітня/апріля 2016 р., о 9.00 год. проґрам «Слово», котрий реалізує єромонах Маркіян ЧСВВ. Повторіня 3. квітня/апріля о 12.00, 15.00, 20.00 год. і 4. квітня/апріля о 2.00, 8.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото – Гора крестів в Шавлях на Литві – джерело вікіпедия.