Соспільны досліджыня о женах і іх потомках, выселеных в рамках Акциі «Вісла»

Передаєме інформацию, котра пришла до нас недавно, а тыкат ся запрошыня взяти участ в соспільных досліджынях (з обшыри культурового знаня жен і його трансферу в выселеній і выкоріненій спільноті). До тых досліджынь, веденых др Йоанном Степанюк, запрошены сут жены, якы были выселены в рамках Акциі «Вісла», або потомкы выселенців (напр. дівка, внучка), предовшыткым жыючы днес в Варшаві і околицях. Заінтересуваны особы прошены сут о е-майльовий контакт на адрес: joanna.badania.miedzykulturowe@gmail.com.

Др Йоанна Степанюк – доктор соспільных наук в обшыри педаґоґікы. То абсольвентка Выділу педаґоґікы і психолоґіі Університету в Білымстоку. В 2015 р. оборонила докторску дисертацию на Академіі Специяльной Педаґоґікы в Варшаві, котрой темом была меджекультурова едукация посеред діти чеченьскых і вєтнамскых іміґрантів в Польщы. Наштоден учытелює та веде науково-дослідничу діяльніст в просторах: меджекультурова і вельокультурова едукация; права дітины; проблематыка позаурядовых орґанізаций; социйотерапія як вид психолоґічно-педаґоґічной помочы. Науковы досліджыня веде в рамках своіх проєктів та і реалізуваных в Академіі Специяльной Педаґоґікы і на Варшавскым Університеті. Приналежыт до ґрупы експертів до справ меджекультуровой едукациі в рамках проєкту «Ріжнорідніст посеред/в нас», веденого при Осередку Розвитку Едукациі в Варшаві.

На фото горі: Ізбяне по выселіню в рамках Акциі «Вісла», знимка з архіву Параскєвы Бреян.