Союз писателів у Сваляві бісідовав о своїй будучности

Як інформує сайт Русинські писателї Подкарпатя, в суботу 13-го мая 2023-го року в просторах Свалявского общества підкарпатьскых Русинів одбыв ся форум славяньскых языків, на базі котрого членове Союзу русиньскых писателів Закарпатя обговорили планы діятельности по обновліню роботы того общества.

Участниками форуму меджі іншыма были голова Свалявского общества підкарпатьскых Русинів Іван Кушнір, членове правліня общества Михаіл Кеменяш, Василь Сакранич і Михаіл Заадяк, членове правліня Союзу русиньскых писателів Закарпатя Іван Бинячовскый і Павло Евреш, як далшы членове союзу а гості.

Лекція Димитрія Попа

Головным орґанізатором і ведучім форуму быв Димитрій Поп, русиньскый славіста, голова Русиньского научно-освітнього общества. Тот приготовив на форум лекцію на тему Русиньскый язык меджі другыма славяньскыма языками.

В лекції участны могли выслухати о історії походжіня Славянів і їх языка, але і о історії Русинів а їх бісіды. Поп говорив о русиньскім языку, днешній ґраматіці ці азбуці. Порівняв русиньскый язык з іншыма славяньскыма языками, бісідовав о нюансах, котры дотуляють ся русиньской ґраматікы, і найвекшый акцент клав на азбуку русиньского языка.

Председа вмер три рокы тому

По лекції участны перешли до основной части форуму – обговоріня далшого фунґованя Союзу русиньскых писателів Закарпатя.

Член правліня – Іван Бинячовскый, курто поінформовав о сітуації в союзі. Одколи вмер председа орґанізації Михаіл Град, што было три рокы тому, союз писателів став подля участных мертвов орґанізаційов. Так само Бинячовскый інформовав, же двоми членове правліня написали выголошіня з просьбов выключіти їх з правліня з тым, же хотять зістати членами орґанізації. Тоты выголошіня Бинячовскый на форумі і прочітав.

Кедьже дві місця в правліню стали вакантныма, участны провели голосованя, в котрім за новых членів правліня Союзу русиньскых писателів Закарпатя выбрали писателів Мигаля Чикивдю і Юрія Мельника.

Рихтують зборы

На форумі обговорила ся і кандідатура Димитрія Попа на посаду головы літературного общества. І кедь членове Союзу русиньскых писателів Закарпатя были согласны з тым, же Поп може быти достойнов головов орґанізації, рішыти ся буде аж на офіціалных зборах.

Было договорено чімскоріше зорґанізовати зборы Союзу русиньскых писателів Закарпатя, на котрых выберуть собі членове нову голову, а так само будуть рішыти ся хыбы общеста, але і зачнуть з реалізаційов вшытко, што было на форумі обговорено.

Фото: Микола Поцко

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА