Співы мого роду 2016

В днях 2.-4. грудня/децембра т.р. на Пряшівскій Руси пройде 14. цілословацкій фестіваль співаків русиньскых народных співанок – Співы мого роду. То подія направлена на дітячых та дорослых выконавців, котры тот рік будут мати змогу запрезентувати ся в лабірскым реґіоні.

Подія, котрой головным орґанізатором являт ся Русиньска Оброда на Словациі, пройде в пятницю (2.12) та неділю (4.12). Проґрам фестівалю заплянувано так, жебы пятниця была посвячена дітячым выступліням, а неділя – дорослым. 2. грудня/децембра перший концерт в рамках тогорічных Співів мого роду пройде од 9.00 год. в кіносали меджелабірского дому культуры. В тот же ден, о 12.00 год., молоды співакы і співачкы перенесут ся на ґальовий концерт до Радвани над Лабірцьом. Недільне пополудне з фестівальом про дорослых зачне ся од 13.00 год. концертом в домі культуры в Красным Броді. Дальше ґальовий концерт, такой завершаючий подію, верне зас до Меджелабірців (початок од 17.00 год.).

Орґанізуваний каждорічно фестіваль Співы мого роду то єдна з найпопулярнійшых культурно-соспільных акций Русиньской Оброды. То подія, котра – окрем презентациі народной русиньской співанкы – дає змогу запрезентувати ся і авторскым творам. В рамках фестівалю ведений є конкурс, котрий має за задачу нагороджувати найліпшых співаків, так в катеґориі дітячых, як і дорослых співів. В конкурсі переважно берут участ народны співакы, котры наштоден ведут артистичну роботу в поєдных фольклорных колективах. Так, на конкурс все приходит даяка народна капеля, котра пригрыват выступуючым, підкрисляючы, же то фестіваль жывой співанкы. Рік-по-рік фестіваль вынаходит новых талантовитых выконавців русиньской музычной культуры, но головно серед діти, котры чысленно берут участ в подіі. Орґанізаторы подіі кажду едицию проводят в інчых місцях, по містах і русиньскых селах.

Вступне на подію є дармо. Подія є реалізувана з підпором Уряду Влады Словацкой Республикы в рамках проґраму Культура Нацийональных Меншын 2016.