«Спомний собі Лемку» – бесіда з Параскєвом Бреян про лаґєр Явожно і його вязнів - віторок, 19.00 год. - lem.fm

Запрашам на бесіду з Параскєвом Бреян (з д. Фрицка), котра народила ся 2. листопада/новембра 1924 рока в селі Ізбы на Лемковині. Оповіст нам она про лаґєр Явожно і його вязнів, котры на місяц перед выгнаньом Ізбян з іх прадідівской землі остали забраны до Явожна. Причыном іх увязніня в концентацийным лаґрі были вымушены і спрепаруваны комуністами оскаржыня.

Параскєва Бреян сесу траґічну подію споминат з власных досвідчынь, понеже єдным з ізбяньскых хлопців, котры были увязнены в Явожнім, был єй муж – Михал Бреян.

Спомне тіж про німецкій лаґєр примусовой роботы в Плашові (Zwangsarbeitslager Plaszow des SS- und Polizeiführers im Distrikt Krakau), котрий пак был переменуваний в концентацийний лаґєр (Кonzentrationslager Plaszow bei Krakau). Буде і про інчы подіі звязаны з неспокійным періодом жытя на Лемковині перед самым выгнаньом.

Долов, полний спис жытелів Ізб, поневоленых в лаґрі Явожно:

Михал Бреян
Кірей Косовскій
Михал Ропицкій
Ваньо Квока
Тимко Гоць
Ваньо Кунцік
Ксандер Ванько

izbiane_jaworzno — Видно деякы хыбы в писовни назвиск, як і місцях народжыня. Выникают они з того, же п. Євген Місіло переписал даны з ориґінальных документів, зрыхтуваных комуністами, де блудні записанo деякы річы. Кєд дахто видит іщы деякы хыбы – напиште до нас.

Горі презентуєме спис вязнів Явожна зо села Ізбы, котрий приготовил п. Євген Місіло. Дякуєме за поміч в досліджынях. Достали сме інформацию, же автор книжкы “Akcja Wisła” тепер працує над обшырным выданьом позициі нт. явожняньского лаґру, в котрым буде находил ся полний спис вязнів.

Спомины єдного з вязнів – Михала Ропицкого, найдены в сервісі YouTube.

https://www.youtube.com/watch?v=3I2kBh_3I9E

За тыма мотузками (част І і част ІІ) можете прочытати спомины Параскєвы Бреян, котры остали списаны Анном Рыджанич, а пак печатаны в Православным Перегляді.