«Спомний собі Лемку» – І част бесіды з Владиміром Олеснєвичом з Перункы – четвер, 21.00 год.

В днешнім проґрамі «Спомний собі Лемку» перенесеме ся на чужыну до Бродовиц коло Рудной. Одвиділи сме гын п. Владиміра Олеснєвича, котрий народил ся в 1922 році в селі Перунка на західній Лемковині. Сес одтинок буде першом частю нашого обшырного інтервю, завдякы котрому познаме жытя на Лемковині, детальні зазриме до лемківского варштату, м.ін. дознаме ся, як ся звали ріжны нарядя, котры наштоден служыли каждому ґазді.

В днешній бесіді вартат звернути увагу на богате словництво, котре днес уж, на жаль, рідко хоснуєме. Богатий язык ґенерациі родженой перед 1947 роком свідчыт про наше дідицтво, котре через такы награня маме змогу документувати. Вартат слухати для ліпшого знаня рідного языка! Бесіду з п. Олеснєвичом провела Олена Дуць.

Владимір Олеснєвич то рідний брат п. Штефаніі Гайтко, з котром в ефірі радия лем.фм могли сме бесідувати якысий час тому.

«Спомний собі Лемку» то проґрам, в котрым можете почути цікавы річы про минуле, про рідну Лемковину, але і жытя на чужыні. Інтервю ведены молодым чловеком, дают надію старшым його бесідникам на ліпше заран для лемківского народу. Сес проґрам то поворот до втраченого лемківского щестя.