Стартує Творча Бібліотека в Рускій Бурсі

До бурсяной бібліотекы все добрі зайти. Каждого рока купуваны сут новости з обшыри лемкознавчых і околокарпатскых публикаций, а завдякы спілпрацы з чысленныма орґанізациями і інституциями, в колекциі бібліотекы находят ся праві вшыткы новы книжкы печатаны в повязаню з русиньскым світом. Окрем того книжкы і платні даруют бібліотеці і приватны особы. Єст в чым выберати і што чытати.

З бібліотекы скорыстати може каждый, до чого незмінні заохочаме. Окрем науковых і популярнонауковых книжок, є вельо періодиків, альбумів, співників, поезиі, белетристикы, а тіж книжок і книжочок для діти. З думком о наймолодшых хоснувателях бібліотекы Стоваришыня «Руска Бурса» в Ґорлицях задумало ініциятиву під назвом «Творча Бібліотека».

Бібліотека то не лем місце, де тримат ся книжкы. То предовшыткым місце, котре інспірує, є скрабницьом і джерелом знаня, котре може одкрывати двері до ріжных світів, дає розрывку, розвиват креативніст і фантазию. Бібліотека дає забаву і отверат ворота до познавчой і творчой подорожы, што николи ся не кінчыт. Несены тым ритмом, просиме на цикль стріч для діти і молодежы, вчас котрых рыхтуваны будут розмаіты ручной роботы артефакты.

Першы занятя пройдут уж в суботу 2. марця тр. в само полудне – о 12.00 год. (по пробі ансамблю Терочка). Будут то варштаты малюваня акрильовыма фарбами полотняных мішків/торб. Малювати буде мож подля свойой думкы або од зрыхтуваных шаблонів. На другы занятя просиме о місяц, 6. квітня/апріля (тіж субота). Товды будеме робити бібулковы квіткы, такы як давно (або недавно) робили нашы бабы. На Квітну Неділю (за старым календарьом) запрашаме на малюваня писанок традицийном батіковом методом, а о дальшых будеме інформувати в своім часі, будут то м.ін. варштаты ляльок-мотанок ци рыхтуваня традицийных вінців на гробы з сушеного квітя. Інструкторком занять є Олена Дуць. Вступне на вшыткы варштаты дармо – забезпечаме тіж материялы.