Стоваришыня Лемків має 25 років

25 років тому, 5 марця 1989 рока, в Ліґници была заложена перша по выселіню, незалежна, соспільна лемківска орґанізация. То Стоваришыня Лемків, доднес найвекша лемківска орґанізация в Польщы. 

На заложытельскым зобраню принято статут і тымчасовий заряд, котрий мал формальні довершыти реєстрациі. До заряду выбраны были – Андрий Копча – предсідатель заряду, Штефан Косовскій і Петро Трохановскій як його заступці, секретарьом был выбраний Ярослав Горощак, Штефанія Дубец скарбником, а членами заряду остали Ярослав Хомяк, Штефан Дычко, Богдан Ґамбаль, Владимір Горбаль, Тома Молодчак, Миколай Падухович, Митро Русинко і Ярослав Зволіньскій. 

На стрічы в Ліґници присутны были тіж украіньскы діячы, котры не хотіли записати ся до новой орґанізациі. Адміністрацийний выділ воєвідского уряду в Ліґници зареєструвал стоваришыня 7 квітня 1989 рока.

Стоваришыня Лемків было ініциятором впроваджыня вчыня лемківского языка до основных і середніх шкіл, як тіж орґанізуваня лемківской філолоґіі. Против вчыню лемківского языка в школах од початку остро протестували украіньскы орґанізациі.

Інформацийным журналістичным органом стоваришыня є двомісячник „БЕСІДА”, котрой перший номер вказал ся 30 червця 1989 рока.