Стріча коло Дунаю з Даніелов Ґаландовов

Здружіня інтеліґенції Русинів Словеньска і тот рік продовжує у своїм успішнім форматі бісід під назвов Стрічі коло Дунаю. Далша бісіда одбуде ся 29-го септембра 2016-го року і гостьом буде Даніела Ґаландова.

Директорка безпрофітовой орґанізації Карпатьскы деревяны церькви Даніела Ґаландова буде участным бісідовати о доповніню експозіції Александра Духновіча в ґрекокатолицькій деревяній церькви в Тополі, інвентарізації културной дідовизны в окресах Снина і Собранці, всокочіню културной дідовизны меншын про розвиток реґіону Снина, захрані деревяного храму в Шмиґовці і о Біціґльовій стежці ікон Новоселиця – Іновець.

Остатня спомянута актівность здобыла номінацію на Ціну Словацькой републікы за країну 2016. Тоту ціну выголосило Міністерство жывотного оточіня Словацькой републікы в тім році. В рамках стрічі буде промітаный і документарный філм КДЦ – Обновлены памяткы.  Стріча зачінать о 17.00 год. в просторах Конґресового центру Высокошкольского інтернату Дружба (Botanická 25) в Братіславі.

Безпрофітова орґанізація Карпатьскы деревяны церькви (Karpatské drevené cerkvi, n. o.) была заснована у 2012-ім році на прінціпі партнерства самосправ і обидвох церьквей выходного обряду (ґрекокатолицькой і православной). Цільом є сполочный поступ при всокочіню, обнові і презентації деревяных храмів.

Орґанізація ся замірявать на гляданя пристойных способів хоснованя церьквей в припадах, кідь їх із різных причін не мож хосновати на богослужіня. Окремо ся орґанізація орьєнтує на самосправы з цільом ефектівно схосновати потенціал деревяной церьковной архітектуры про розвиток економічно слабшых пригранічных реґіонів. Із той причіны є векшына актівностей в сучасности концентрована на окресы Снина і Собранці. Безпрофітова орґанізація Карпатьскы деревяны церькви є членом Округлого стола Русинів Словеньска.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА