Стріча родаків села Руське

Лісопольногосподарьске і урбарьске фундушове общество Руське із центром в Снині сердечно запрошать на Стрічу родаків села Руське, котра буде проходити в днях 3-го аж 5-го юла 2015 р.

То вже округла 25-та стріча родаків днесь вже неіснуючого села, в рамках котрой на вас чекать богатый културно-шпортово-сполоченьскый проґрам. Стріча буде проходити в катастрі села Руське на місці званім „під Кычеров“.

Руське было русиньске село на Словакії в окресі Снина. У 1980 році были вшыткы жытелі выселены з причіны будованя водной програды Старина (вєдно з далшыма русиньскыма селами). Першый писемный документ о селі є з року 1567. Село належало гуменьскому паньству, пізніше дакілько фамеліям.

Зо села всокотив ся містный сельскый цінтерь, капля на місці збуряной церькви із 1789 р., воєньскый цінтерь із Першой світовой войны і три домы. В середині села під цінтерьом є хрест коло драгы (як є звыком будовати хресты коло драг) із 1955 р. З кінця бывшого села до Руського сідла веде заховала драга із каміня, котра є з 1861 р. і має назву Porta Rusica.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА