Стріча РОС і метрополіты Йоана

Вчера, 21-го апріля 2015 р. стрітили ся представителі Русиньской оброды на Словеньску (РОС) – Мілан Мнягончак, председа і Петро Медвідь, секретарь в просторах Ґрекокатолицького архієпіскопского уряду в Пряшові з преосвященым владыком Йоаном Бабяком, архієпіскопом пряшівскым і метрополітом Словакії.

Стрічу ініціовав председа РОС Мілан Мнягончак і пожадали го о ню ґрекокатолицькы священици, котры суть членами Общества св. Йоана Крестителя. Темов стрічі была будучность русиньскых літурґічных тлумачінь і їх хоснованя в ґрекокатолицькых храмах на парафіях, де жыють Русины.

Жадость ґрекокатолицькых священиків была выкликана писмом владыкы Йоана, в котрім уділив status quo на десять років, якым заказав будьякы далшы літурґічны тлумачіня в русиньскім языку. Дотеперь было выдане напр. Тетраєвангеліє, Апостолы, Требник І-шый том і далшы. Причінов владыком выданого заказу далшых тлумачінь мало быти подля слов владыкы Йоана то, же священици зачали служыти зо саміздатом выданого Требника ІІ-гый том, котрый не быв дотеперь схваленый і тым подля нього священици справовали ся неспослухняно. Священици на свою обрану і перед Округлым столом Русинів Словеньска повіли, же ІІ-гыт том Требника є 10 років приготовленый і архієпіскоскый уряд не мав інтерес рішыти його схваліня.

На стрічі были тоты проблемы обговорены. Представителі РОС підкреслили владыкови, же 10-річный заказ може важно пошкодити Русинам і помочі асімілації жытелів. Так само звернули увагу на то, же як раз ґрекокатолицьке духовенство было все підпоровательом розвитку русинькой ідентічности, з того духовенства вышли нашы найвекшы будителі. Так само было з боку представителів РОС повіджене, же такым заказом не покарають ся священици, котры подля слов владыкы не слухають і не честують церьковну авторіту, але найвеце покарають ся просты люди, котры бы хотіли мати штонайвеце богослужінь в материньскім языку.

Владыка Йоан з порозумліньом выслухав тоту проблематіку і быв согласный о тых проблемах діскутовати і вырішыти їх ку спокійности. Так само быв согласный з тым, жебы ся стрітити з представителями Общества св. Йоана Крестителя, де бы ся о тій проблематіці бісідовало, і де бы могли быти участны і представителі РОС. Но ясно повів, же о тоту стрічу мусять в першім ряді пожадати самы священици, котры так дотеперь не зробили.

По годиновій діскузії представителі РОС з владыком Йоаном доїднали ся, же ся будуть намагати о таку стрічу з представителями Общества св. Йоана Крестителя в просторах архієпіскопского уряду. Владыка ку кінцю стрічі підкреслив, же про Русинів є найважніше школство, котре ту бракує, бо без нього не буде далшых ґенерацій. О то бы ся подля слов владыкы мав русиньскых рух найвеце намагати.

Петро Медвідь

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА