Стріча з о. Мирославом Цідило – різдвяны звыкы в православній традициі

Уж в найблизшу пятницю, 16. грудня/децембра т.р., Музей Дворы Карвациянів і Ґладышів з Ґорлиц просит на стрічу з настоятельом православной парохіі свв. Космы і Даміана в Бортным – о. Мирославом Цідило. Цілю стрічы є представліня гостям різдвяных звыків, якы товаришат православній традициі празднуваня Рождества Христового. Подія зачне ся од 17.00 год. в Дворі Карвациянів в Ґорлицях.

Як священник анґажує ся в інчы подіі, котры Музей Дворы Карвациянів і Ґладышів орґанізує і в Бортным, а то з той причыны, же бывша грекокатолицка церков свв. Космы і Даміана є днес частю музейного комплексу. То до ней час-до-часу музей запрашат на всякого рода подіі, зачынаючы од екуменічного чытаня Біблиі, в котрым берут участ православны, грекокатоликы і римокатоликы, а кінчучы на выставах ікон, образів та фотоґрафій.

Влони о. Мирослав Цідило угоноруваний был за опіку над забытковыма обєктами, входячыма в склад його парохіі. Заслужыл ся він медже інчыма ремонтом і адаптацийом будинку старой плебаніі на Парохіяльний Історично-Природничий Музей, або проведіньом консерваторскых і реставраторскых робіт трьох церкви в Бортным, Бодаках і Волівци. Посліднім часом на портали lem.fm і в тыжденнику ЛЕМ.фм+ інформувал про дальшу долю перунчаньского креста, котрий колиси вічныл православну церков, а днес стараньом м.ін. Даміана Новака, Руской Бурсы і о. Цідилы – находит ся на чужыні, в селі Стодоловиці, де днес прожыват найбільше чысло выгнаных жытелів Перункы.

Фото: Миколай Ґрич