Стріча з сакральном штуком Лемковины в Саноку

Ярослав Ґємза – автор монументальной книжкы «Церкви і іконы Лемковины», не стримує активной промоциі і просит на дальшы стрічы з публикацийом. В найблизшу пятницю, 10. марця т.р., авторска стріча одбуде ся Історичным Музею в Саноку, де од 17.00 год. подібні як на попердніх прелекциях одбуде ся доповід нт. істориі східніх Церкви на обшыри Лемковины, як і презентация самой книжкы. 

До той поры подібны стрічы одбыли ся в Дворі Карвациянів і Ґладышів в Ґорлицях, на краківскым грекоактолицкым приходстві, ци в Митрополитальным Уряді Перемышльско-Варшавской Грекокатолицкой Архієпархіі. Іщы перше автор стрітил ся з владыками єпархій, якы свойом юрисдикцийом обнимают Лемковину. Книжка была дарувана православному владыці перемышльско-ґорлицкому Паісийови, як тіж грекокатолицкому митрополиті перемышльско-варшавской архієпархіі, архієпископови Євгенійови.

На каждій зо стріч Ярослав Ґємза не лем односит ся до істориі Церкви і дальшой фактоґрафіі, але як сме могли чути в ефірі радия ЛЕМ.фм, детально презентує свою книжку. Автор підповідат, як треба єй чытати і розуміти, прото же остала  поділена на три обшырны розділы, якы презентуют церковну культуру од Візантиі до днешньости. Окрем того, находит ся в ній детальний допис – продолжыня безцінной статі Єжы Тура сперед 30. років, котра односит ся до стану лемківскых храмів як раз на тамтот час, підкрислаючы самособом, же вельо цінности пропало на все і то не лем за справом выгнаня Русинів, але часто тіж при помочы новых осадників і опікунів церкви. До той поры на поєдных авторскых стрічах мож было придбати речений альбом по низшій ціні. Книжка, котра чыслит близко 700 сторін кольорового паперя, зберігат в собі додатково мапу церкви на Лемковині і з територий з ньом сусідуючых, як тіж дальшы великы опрацуваня, прим. іконостасів, з детальныма даныма як выміры. Про детальний опис книжкы сігайте гев.