Стрічы Трьох Поколінь уж не лем пшемківскы

Місяц жолтен/октобер дост богатый в чысло подій орґанізуваных Стоваришыньом Лемків. Уж в найблизшый вікенд на Лемковині одбуде ся ХХХІ Лемківска Творча Осін, а о два вікенды пізнійше, в днях 21.-22. жолтня/октобра на Нижнім Шлеску пройдут ХVI Стрічы Трьох Пиоколінь з Лемківском Культуром.

Што основне при тій подіі – другіраз запоряд потырват аж два дни, а місце єй одбываня буде не лем в Пшемкові.

Стрічы Трьох Поколінь з Лемківском Культуром то найважнійша подія орґанізувана каждый рік Кружком Стоваришыня Лемків в Пшемкові і єдна з найважнійшых для цілого Стоваришыня Лемків. Ци подія приняла уж модель дводньовой імпрезы?

Через такой першых штырнадцет едиций Стрічы проходили все єдного дня і переважно в Пшемківскым Осередку Культуры (за вынятком рока, коли проходил ремонт його просторів). Влони, на ювілейну ХV едицию орґанізаторы задумали провести першыраз дводньовы Стрічы, котры одбыли ся в першый ден в Пшемкові (субота), а в другій ден в Шпротаві (неділя).

Того рока буде подібні, хоц в другій ден подія перенесе ся до гейбы недалекых од Пшемкова Радваниц. Подібні як влони, на тот момент знаме, што певністю єдного і другого дня запрезентуют ся ґаздове – ЛАПіТ «Ластівочка» і його діточа ґрупа «Ластівчата». Хоц орґанізаторы мают уж цілый проґрам рішеный, несподіванком буде, якы ансамблі – гості ґаздів – будут презентувати ся на пшемківскій і радваницкій сценах.

Стрічы Трьох Поколінь то подія, яка каждого рока громадит великє чысло Лемків з Пшемкова і околиц та іх польскых приятелів. Тым разом, окрем Пшемкова, де жыє вельох Лемків, подія загостит і до Ґмінного Осередка Культуры в Радваницях – місцевости, в котрій так само прожыват гідні Лемків, а в місцевій школі ведены сут лекциі лемківского языка.